Engin ákvörðun hefur verið tekin um útgáfu ákæru í máli Skúla Tómasar Gunnlaugssonar, fyrrum læknis á Heilbrigðisstofnun Suðurnesja. Þetta kemur fram í svörum frá Héraðssaksóknara. Lögregla lauk rannsókn á málinu í febrúar 2023 eftir að hafa haft það til rannsóknar í tvö ár. Þaðan fór það til héraðssaksóknara og hefur verið þar til rannsóknar í þrjú ár. Skúli sætti lögreglurannsókn vegna gruns um að hafa valdið ótímabærum dauðsföllum sex sjúklinga árin 2018–2020 á Heilbrigðisstofnun Suðurnesja. Rannsakað var hvort fólkið hefði verið sett í ótímabæra lífslokameðferð. Í grein sem Eva Hauksdóttir lögfræðingur birti á Vísir.is segir hún fimm ár liðin síðan hún og systkini hennar lögðu fram kæru á hendur þremur heilbrigðisstarfsmönnum vegna þeirrar meðferðar sem móðir þeirra fékk á Heilbrigðisstofnun Suðurnesja. Rannsókn á mál tveggja starfsmanna var felld niður en rannsókn á máli Skúla Tómasar var haldið áfram. Getur haft áhrif á niðurstöðu málsins Hún segir að svo langur málsmeðferðartími geti haft áhrif á niðurstöðu málsins. „Ef það fer svo að það verði ákært í málinu og ef niðurstaða dóms verður sakfelling þá eru dómafordæmi fyrir því að svona langur málsmeðferðartími geti haft áhrif á lengd refsingar,“ segir Eva sem telur slíkt þó eðlilegt. „Þó að ég vilji fá þennan mann ákærðan og sakfelldan þá hef ég alveg samúð með honum og þeim ógnartíma sem hann er í biðstöðu og auðvitað eru brotaþolar, eins og í þessu tilviki aðstandendur, í biðstöðu líka, en þetta er eiginlega verra fyrir sakborninginn,“ segir hún. Eva leitaði til Umboðsmanns Alþingis fyrr í mánuðinum. Hún segist í grein sinni binda veikar vonir við að meira verði gert en að embættið sendi héraðssaksóknara fyrirspurn um stöðu málsins og skrifi henni svo bréf. „En það er voðalega lítið sem maður getur gert, nema þá að vekja athygli á þessu,“ segir Eva. Manndrápsmál fyrnist ekki Í öðrum svörum frá héraðssaksóknara segir Karl Ingi Vilbergsson, saksóknari að í dag séu alls 259 mál sem bíða afgreiðslu hjá ákærendum á saksóknarsviði 1 sem tengjast kynferðisafbrotum og alvarlegum ofbeldisbrotum. Þar af séu 49 mál sem hafi verið til afgreiðslu hjá ákæranda í 12 mánuði eða lengur. Ekki sé unnt að keyra út úr málaskráakerfi lögreglunnar (LÖKE) yfirlit yfir fjölda mála sem hafi fyrnst í meðförum lögreglu eða ákæruvalds. Þó segir að afar fátítt sé að slík mál fyrnist hjá embættinu. Karl Ingi Vilbergsson varasaksóknari segir í samtali við fréttastofu að málið sé rannsakað sem manndrápsmál og að slík mál fyrnist almennt ekki. „En auðvitað hefur það afleiðingar ef það er óeðlilegur dráttur á meðferð máls,“ segir hann. Dæmi séu um að refsing sé vægari ef mál dragast lengi og að í einhverjum tilfellum verði hún skilorðsbundin. Hann segist þó ekki geta tjáð sig beint um mál Skúla. Hann taki þó fram að málið sé flókið og mjög umfangsmikið. „Þetta tekur bara þennan tíma,“ segir hann. Eva segir málið ekki einsdæmi. „Svona langur málsmeðferðartími er bara mjög algengur, ekki bara hjá lögreglu og héraðssaksóknara heldur alls staðar í stjórnsýslunni,“ segir Eva sem telur tafir sem þessar orðnar stórt vandamál í samfélaginu. „Erum við fær um að reka réttarríki? Ef við höfum ekki mannafla til þess að sinna þessum verkefnum sem stjórnvöldum eru falin,“ spyr Eva.