Af 2.453 börnum sem eru á biðlista eftir þjónustu hjá Geðheilsumiðstöð barna hafa 1.900 beðið lengur en þrjá mánuði. Umboðsmaður barna segir gögn ekki benda til þess að almennt fjölgi á biðlistum en að bið hafi lengst. Biðlistar segi þar að auki ekki alla söguna því sums staðar er allt að þriggja ára bið eftir að komast á biðlista. „Við erum þeirrar skoðunar að það þurfi auðvitað að ráðast til atlögu við þessa löngu bið barna sem við sjáum svo víða,“ segir Salvör Nordal, umboðsmaður barna. „Það sem stendur upp úr almennt er alltaf að það eru of mörg börn að bíða og þau eru að bíða of lengi. Þetta er það sem við höfum séð allan þann tíma frá því að við byrjuðum að safna þessum tölum.“ Umboðsmaður barna birti gögn um bið barna eftir þjónustu í febrúar. Börnum á biðlista Geðheilsumiðstöðvar fækkaði milli ára en töluvert fleiri bíða en þegar umboðsmaður barna hóf að safna gögnum í árslok 2021. Þá biðu tæplega 740 börn. „Það er ekki þessi mikla fjölgun hjá Geðheilsumiðstöð eins og hefur verið undanfarin ár en hins vegar er biðtíminn að aukast hjá þeim sem eru á bið. Hann getur verið alveg upp undir þrjú ár. Það er auðvitað mjög langur tími í lífi barns.“ Bið barna eftir þjónustu: Geðheilsumiðstöð barna – 2.453 börn biðu. 1.900 höfðu beðið lengur en þrjá mánuði. 785 biðu eftir athugun vegna gruns um einhverfu. Meðalbiðtími var 36.3 mánuðir. 1.742 biðu eftir athugun vegna gruns um ADHD. Meðalbiðtími var 27,2 mánuðir. Ráðgjafar- og greiningarstöð – 715 börn biðu, þar af höfðu 644 beðið lengur en þrjá mánuði. Heilbrigðisstofnun Norðurlands, sálfræðiþjónusta – 135 börn bíða. 87 hafa beðið lengur en þrjá mánuði. Miðgildi biðtíma er 140 dagar. Heilsugæsla höfuðborgarsvæðisins, sálfræðiþjónustu – 221 barn bíður. 78 hafa beðið lengur en þrjá mánuði. Miðgildi biðtíma er 62 dagar. Göngudeild BUGL: 37 börn bíða eftir þjónustu göngudeildar. Meðalbiðtími er 1,9 mánuðir og ekkert barn hefur beðið lengur en þrjá mánuði. Fimm börn bíða eftir átröskunarmeðferð. Meðalbiðtími er 39 dagar. Barnahús – 46 börn biðu eftir meðferð. 14 höfðu beðið lengur en þrjá mánuði. Meðalbiðtími var allt að 148 dagar. Barna- og fjölskyldustofa: 9 börn bíða eftir MST-þjónustu, meðferðarúrræði fyrir fjölskyldur barna 12-18 ára með alvarlegan hegðunarvanda. Meðalbiðtími var 43,4 dagar. Tvö börn bíða eftir styrktu fóstri. Meðalbiðtími var 42 dagar og eitt barn hafði beðið lengur en þrjá mánuði. Eitt barn bíður eftir að komast inn á Lækjarbakka og eitt í Blönduhlíð Ekkert barn bíður eftir meðferð á Stuðlum eða hjá Bjargey. Heilsuskóli Barnaspítalans – 66 börn biðu. Meðalbiðtími var 9,8 mánuðir og 34 börn höfðu beðið lengur en þrjá mánuði. Gögnum safnað í janúar og febrúar 2026. Bið barna eftir sálfræðiþjónustu á heilsugæslustöðvum: Heilsugæsla höfuðborgarsvæðisins – 221 barn beið. Meðalbiðtími var 101 dagur og 78 börn höfðu beðið lengur en þrjá mánuði. Heilbrigðisstofnun Norðurlands – 135 börn biðu. Meðalbiðtími var 140 dagar og 87 börn höfðu beðið lengur en þrjá mánuði. Heilbrigðisstofnun Vesturlands – 7 börn biðu. Meðalbiðtími var 98 dagar og 1 barn hafði beðið lengur en þrjá mánuði. Heilbrigðisstofnun Austurlands – 18 börn biðu. Meðalbiðtími var 56 dagar og 5 börn höfðu beðið lengur en þrjá mánuði. Heilbrigðisstofnun Suðurlands – 35 börn biðu. Meðalbiðtími var 6-8 vikur. Heilbrigðisstofnun Suðurnesja – 37 börn biðu. Meðalbiðtími var 82 dagar. Gögnum safnað í janúar og febrúar 2026. Fjöldi barna á biðlistum sé almennt sambærilegur og í fyrra. Hins vegar sé bið á mörgum stöðum í kerfinu allt of löng, jafnvel áður en börn komast á biðlista hjá opinberum stofnunum. „Við höfum heyrt, bæði frá fagfólki og líka frá foreldrum, dæmi um börn sem hafa beðið hjá sveitarfélagi eftir frumgreiningu, jafnvel í tvö til þrjú ár.“ Sá tími bætist við þann tíma sem börn eru á biðlista hjá opinberum stofnunum. „Síðan höfum við líka verið að heyra af því að börn, sem eru búin að fá greiningu og búið að samþykkja að þau þurfi að fá ákveðna þjónustu, eru ekki að fá þá þjónustu vegna þess að það er fjárskortur hjá viðkomandi sveitarfélagi eða einhverjar ástæður fyrir því að ekki er hægt að veita þessa þjónustu þegar búið er að samþykkja hana.“ Salvör segist hafa miklar áhyggur af því að fleiri börn komi við sögu í ofbeldismálum sem tilkynnt eru til Lögreglunnar á höfuðborgarsvæðinu. „Hvort sem þau eru brotaþolar eða sakborningar. Þeim hafi verið að fjölga á síðustu árum og það er auðvitað mikið áhyggjuefni.“ Meiri bið eftir talmeinaþjónustu Umboðsmaður barna hefur einnig miklar áhyggjur af bið eftir þjónustu talmeinafræðinga. Í desember 2021 var 3.701 barn á biðlista, þar af 947 börn skráð á fleiri en einum stað. Þau höfðu flest beðið lengur en 2 ár. Í skýrslu starfshóps heilbrigðisráðuneytisins um þjónustu talmeinafræðinga við börn frá júní 2025 kemur fram að í lok árs 2024 hafi 4.865 börn beðið eftir annars stigs talmeinaþjónustu sem samsvari rúmlega 30% aukningu frá 2021. Umboðsmaður barna fagnar áformum stjórnvalda um miðlægan biðlista en segir að grípa þurfi til aðgerða til að koma í veg fyrir að börn þurfi að bíða eftir þjónustu talmeinafræðinga.