Endur­kaup eigin bréfa eru orðin eitt helsta verk­færi skráðra félaga til að skila um­fram­fé til eig­enda og þar vegur banka­geirinn þungt. Í bréfi sem Jón Finn­boga­son, fram­kvæmda­stjóri Stefnis, sendi eig­endum sjóða félagsins segir hann að þrátt fyrir mót­vind á inn­lendum hluta­bréfa­markaði hafi rekstur margra félaga gengið vel og fjár­magni hafi verið skilað út með bæði endur­kaupum og arði. Í bréfinu bendir Jón á að greiðslur skráðra félaga til hlut­hafa, með endur­kaupum og arð­greiðslum, hafi numið sam­tals 118 milljörðum króna á árinu 2025, þar af 33 milljörðum skilað með endur­kaupum og 85 milljörðum í arð­greiðslum. Þá bendir hann á að 68% af heildar­fjár­hæðinni komu frá fjórum félögum: Ís­lands­banka, Arion banka, Kviku banka og Skel en bankarnir þrír drógu vagninn. Jón segir að aukinn skilningur og áhersla á endur­kaup sé jákvæð þróun hjá félögum í kaup­höllinni á Ís­landi. Af­komu í framtíð er þá skipt á milli færri hluta í félaginu. Það eykur arð­semi þeirra eig­enda sem eftir standa í félaginu. Máli sínu til stuðnings bendir hann á ný­lega grein úr The Economist um hverjir séu „bestu fjár­festar í heimi“ þar sem því er haldið fram að það séu fyrir­tækin sjálf sem hafa í raun reynst farsælustu langtíma­fjár­festarnir. „Á sama tíma ættu félögin að forðast að kaupa eigin bréf ef verðlagning þeirra er með þeim hætti að betra væri að greiða um­fram­fé út sem arð­greiðslu eða fjár­festa enn frekar í eigin rekstri. Stefnir vill beina því til for­stjóra, fjár­mála­stjóra og stjórna skráðra félaga að hafa þetta ávallt í huga,” skrifar Jón í bréfinu. Í sam­tali við Við­skipta­blaðið skerpir Jón þessa línu, segir að endur­kaup geti annaðhvort aukið eða rýrt verðmæti eftir því á hvaða verði þau fara fram. „Við viljum trúa því að stjórn­endur félaganna í kaup­höll hér á Ís­landi raði sér í hóp færustu fjár­festa í heimi og stýri fjár­magni sem þeir hafa til ráðstöfunar með skynsömum hætti. Á sama tíma beinum við því til þeirra að forðast að kaupa eigin bréf ef verðlagning þeirra er með þeim hætti að betra væri að greiða um­fram­fé út sem arð­greiðslu eða fjár­festa enn frekar í eigin rekstri,“ segir Jón. „Ef stjórn­endur félags telja að fjár­hags­legur styrkur þess sé nægjan­lega góður til að félagið geti greitt arð til eig­enda sinna án þess að það komi niður á getu félagsins til þess að standa við sínar fjár­hags­legu skuld­bindingar og geti áfram stundað þann rekstur sem þar fer fram með arðbærum hætti, þá vitum við að arð­semi þess fjár­magns sem eftir stendur í rekstrinum verður hærri fyrir vikið. Sem er gott,“ segir Jón. Áskrif­endur geta lesið um­fjöllun Við­skipta­blaðsins um endur­kaup, árs­reikning Stefnis og bréf fram­kvæmda­stjóra til sjóðs­félaga hér.