Forstjóri Heilsugæslu höfuðborgarsvæðisins segir læknisvottorð vegna skammtímaveikinda sóun á tíma heilbrigðisstarfsfólks. Tími sé kominn til að vinnuveitendur og skólar hætti að kalla eftir slíkum vottorðum þar sem þau hafi engan læknisfræðilegan tilgang. Hátt í 50 þúsund vottorð og rafrænar staðfestingar á skammtímaveikindum voru gefin út á síðasta ári. Skammtímavottorð hafi engan læknisfræðilegan tilgang Hátt í fimmtíu þúsund vottorð og rafrænar staðfestingar á skammtímaveikindum námsmanna og launafólks voru gefin út á síðasta ári. Sigríður Dóra Magnúsdóttir, forstjóri Heilsugæslu höfuðborgarsvæðisins, segir útgáfu slíkra vottorða sóun á tíma heilbrigðisstarfsfólks. Þau hafi engan læknisfræðilegan tilgang og tími sé kominn að vinnuveitendur og skólar hætti að kalla eftir slíkum vottorðum. Þetta kom fram í máli Sigríðar Dóru á opnum fundi Félags atvinnurekenda um veikindi og vinnumarkaðinn sem haldinn var á dögunum. „Eigum við ekki að gera eitthvað í þessu og leita annarra leiða?“ Á heimasíðu Heilsugæslu höfuðborgarsvæðisins kemur fram að á síðasta ári hafi læknar heilsugæslunnar skrifað rúmlega 20 þúsund vottorð á skammtímaveikindum. Þá hafi námsmenn og launafólk sótt um 10 þúsund staðfestingar á skráningu veikinda í sjúkraskrá í gegnum Heilsuveru. Læknar á læknavaktinni skrifuðu rúmlega sjö þúsund vottorð og má áætla að læknar á fjórum einkareknum heilsugæslustöðvum á höfuðborgarsvæðinu hafi skrifað um tíu þúsund vottorð til viðbótar. „Við erum komin hátt í fimmtíu þúsund vottorð um skammtímaveikindi á síðasta ári. Eigum við ekki að gera eitthvað í þessu og leita annarra leiða?“ er haft eftir Sigríði Dóru. Þá velti Sigríður Dóra því upp hvað sé verið að votta í þessum skammtímavottorðum. „Það er enginn læknisfræðilegur tilgangur með þessu.“ Veikindin séu oftar en ekki yfirstaðin þegar fólk komi á heilsugæslu til að fá vottorð. Heilbrigðisstarfsfólk vilji frekar nota tíma sinn í að sinna veiku fólki. Sigríður Dóra segir enga þörf fyrir fólk að koma til læknis að segja frá mígreni eða niðurgangi sem genginn sé yfir. Það fólk eigi bara að vera heima að hvíla sig, en ítrekaði þó að læknar eigi að sjálfsögðu að sinna fólki sem sé ítrekað veikt. Hvetur atvinnurekendur til að líta í eigin barm Heilbrigðisstarfsfólk vilji hafa tíma til að sinna fólki. Að skrifa veikindavottorð séu hluti af því en þau verði að hafa tilgang. „Við viljum grípa ítrekuð skammtímaveikindi. Við viljum grípa fólk sem er alltaf veikt á mánudögum eða endalaust að fá skólavottorð fyrir próf. Þá er eitthvað annað undirliggjandi, þar höfum við eitthvað að segja. Við viljum líka vinna með langvinn veikindi,“ segir Sigríður Dóra. Það þurfi að vera tilgangur með aðkomu læknis. Hún hvetur atvinnurekendur til að líta í eigin barm - hafi þeir áhyggjur af ítrekuðum skammtímaveikindum starfsmanna sinna. Skoða þurfi til dæmis hvort eitthvað sé á vinnustaðnum sem hafi áhrif á líðan starfsfólksins. „Uppsögn er áfall“ Sigríður Dóra gerði veikindavottorð á uppsagnarfresti einnig að umfjöllunarefni og hafnar því að læknar skrifi almennt slík vottorð án ástæðu og athugasemdalaust. „Uppsögn er áfall. Óvænt uppsögn er jafn mikið áfall í lífinu og óvæntur skilnaður eða að verða gjaldþrota.“ Leita þurfi allra leiða til að milda áfallið. „Fólk kemur til okkar og segir frá alvarlegri vanlíðan. Við erum að fá fólk til okkar sem er algjörlega ráðþrota að öllu leyti og líður illa.“