Viðskiptajöfnuður á árinu 2025 var neikvæður um 177,7 milljarða króna, samkvæmt bráðabirgðatölum Seðlabanka Íslands. Það samsvarar um 3,6% af vergri landsframleiðslu. Til samanburðar var viðskiptahalli upp a 148,5 milljarða króna árið 2024 og 53,7 milljarða árið 2023. Ekki hefur verið meiri viðskiptahalli hér á landi í krónum talið frá árinu 2008 þegar hann var um 334 milljarðar króna. Sé hins vegar horft til viðskiptajafnaðar sem hlutfall af VLF, þá var viðskiptahalli síðast meiri árinu 2011. Vöruskiptajöfnuður var neikvæður um 385 milljarða króna í fyrra, samanborið við vöruskiptahalla upp á 323 milljarða árið 2024 og 293 milljarða króna árið 2023. Þjónustujöfnuður var jákvæður um 273 milljarða króna í fyrra, samanborið við 265 milljarða árið áður og 324 milljarða árið 2023. Halli af frumþáttatekjum nam 11 milljörðum króna en 54,7 milljarða króna halli var á rekstrarframlögum. 38 milljarða viðskiptahalli á fjórða ársfjórðungi Á fjórða ársfjórðungi var 38 milljarða króna halli á viðskiptajöfnuði við útlönd eða 3% af landsframleiðslu. Viðskiptajöfnuðurinn versnaði um 72,1 milljarða milli ársfjórðunga en er betri sem nemur 48,4 milljörðum króna miðað við sama fjórðung árið 2024. Vöruskiptajöfnuður mældist neikvæður um 73,4 milljarða króna á fjórðungnum en 49,4 milljarða króna afgangur var á þjónustujöfnuði. Afgangur af frumþáttatekjum nam 1 milljarði króna en 15 milljarða króna halli var á rekstrarframlögum. Hrein staða við útlönd jákvæð um 2.189 milljarða Í lok síðasta árs var hrein staða við útlönd jákvæð um 2.189 milljarða króna eða 44,2% af vergri landsframleiðslu (VLF) og batnaði um 98 milljarða eða 2% af VLF á fjórðungnum. Erlendar eignir þjóðarbúsins námu 7.024 milljörðum króna í lok ársfjórðungsins en skuldir 4.835 milljörðum króna. Erlendar eignir hækkuðu um 19 milljarða og skuldir um 98 milljarða vegna fjármagnsviðskipta. Gengis- og verðbreytingar juku virði eigna á ársfjórðungnum um 297 milljarða króna og skulda um 143 milljarða og leiddu því til 154 milljarða króna betri hreinnar erlendrar stöðu. Gengi krónunnar lækkaði um 3,3% á fjórðungnum miðað við gengisskráningarvog. Verð á erlendum verðbréfamörkuðum hækkaði um 3% milli fjórðunga og verð á bréfum á innlendum hlutabréfamarkaði hækkaði um 9%.