Alls fækkaði störfum í Bandaríkjunum um 92 þúsund í febrúar og benda nýjar vinnu­markaðstölur til þess að vinnu­markaðurinn sé að veikjast þvert á geira. At­vinnu­leysi hækkaði lítil­lega í 4,4%, sam­kvæmt tölum vinnumálaráðu­neytisins sem birtar voru á föstu­dag. Í janúar bættust við 126 þúsund störf, en hag­fræðingar sem The Wall Street Journal ræddi við höfðu að meðaltali gert ráð fyrir 50 þúsund nýjum störfum í febrúar. Eftir birtingu talna lækkuðu bandarískir hluta­bréfa­vísar í fram­virkum við­skiptum enn frekar. Sam­drátturinn er hluti af þróun sem varð greini­leg á síðasta ári. Þá hægði veru­lega á at­vinnu­sköpun og störfum hafði ekki fjölgað jafn lítið síðan árið 2003. WSJ bendir á að skýringanna megi leita að hluta til niður­fellinga og sjálf­viljugra starfs­loka í al­ríkis­geiranum en einnig að mörg fyrir­tæki hafi farið var­legar í ráðningar vegna óvissu um tolla og aðrar stefnumótandi að­gerðir. Þar að auki hafi væntingar um að gervi­greind geti dregið úr mann­aflaþörf hug­san­lega sett strik í reikninginn í ráðningaráætlunum. Þrátt fyrir að upp­sagnir hafi verið áberandi í einstökum málum segir blaðið að heildar­magn upp­sagna sé enn lágt. Vandinn felist fremur í því að fyrir­tæki séu að tak­marka nýráðningar, þannig að vinnu­markaðurinn missi kraft án þess að upp­sagna­bylgja skýri breytinguna