Stóru bankarnir á Wall Street hafa aukið stöður sínar í bandarískum ríkis­bréfum veru­lega og halda nú á meira af slíkum bréfum en nokkru sinni frá því fyrir fjár­mála­kreppuna. Nettóstöður viðskiptavaka á bandaríska ríkisbréfamarkaðnum hafa að meðaltali numið um 550 milljörðum dala það sem af er ári, samanborið við innan við 400 milljarða dala í fyrra, samkvæmt útreikningum Financial Times sem byggja á gögnum Seðlabanka New York. Stöðurnar nema tæp­lega 2% af öllum bandaríska ríkis­skulda­bréfa­markaðnum, sem er um 31 þúsund milljarðar dala að stærð. Hlut­fallið hefur ekki verið hærra frá árinu 2007. Aukningin kemur í kjölfar þess að bandarísk stjórn­völd hafa slakað á eigin­fjár­reglum sem settar voru eftir fjár­mála­kreppuna. Reglurnar höfðu gert bönkum dýrara að halda á stórum stöðum í ríkis­skulda­bréfum, jafn­vel þótt bréfin teljist áhættulítil. Fyrir fjár­mála­kreppuna voru stóru bankarnir burðarásar bandaríska ríkis­bréfa­markaðarins. Eftir 2008 drógu þeir sig hins vegar að hluta til í hlé og vogunar­sjóðir og sér­hæfð við­skipta­fyrir­tæki tóku stærra hlut­verk í við­skiptum með ríkis­skuldir Bandaríkjanna. Sér­fræðingar sem FT ræðir við segja þó ekki lík­legt að bankarnir taki aftur sama hlut­verk og fyrir hrun. Markaðurinn hafi breyst og vogunar­sjóðir og hrað­virkir við­skipta­aðilar verði áfram stór hluti hans. Aukin þátt­taka bankanna gæti engu að síður styrkt lausa­fjár­stöðu á stærsta skulda­bréfa­markaði heims, á sama tíma og út­gáfa bandarískra ríkis­skulda­bréfa hefur aukist mikið vegna mikils halla­reksturs ríkis­sjóðs.