Ávöxtunar­krafa óverð­tryggðra ríkis­skulda­bréfa hækkaði í morgun í kjölfar þess að verðbólga mældist tölu­vert yfir spám greiningar­deilda bankanna. Hreyfingin bendir til þess að markaðurinn sé að endur­meta vaxta­horfur og verð­leggja minni líkur á skjótri vaxtalækkun eða jafn­vel að vaxtalækkanir verði færri en áður var talið. Hreyfingin á óverð­tryggða skulda­markaðnum hefur mest verið á miðju og langa endanum. Krafan á RIKB 28, óverð­tryggt ríkis­bréf með gjald­daga í nóvember 2028, hefur hækkað um 7 punkta í um 238 milljón króna við­skiptum. Sama mynstur sést RIKB 31, sem er með gjald­daga í janúar 2031, þar sem krafan fór einnig upp um 7 punkta í tæp­lega 300 milljón króna við­skiptunm. Á lengri endanum hækkaði krafa á RIKB 35, gjald­dagi í septem­ber 2035, um 5 punkta í við­skiptum yfir 400 milljón króna við­skiptum á meðan krafan á RIKB 38, gjald­dagi í febrúar 2038 fór upp um 7 punkta í 100 milljón króna við­skiptum. Óverð­tryggð ríkis­bréf eru bréf þar sem höfuðstóllinn fylgir ekki vísitölu. Fjár­festar bera því verðbólguáhættuna beint í þeim bréfum ólíkt verð­tryggðu flokkunum. Þegar verðbólga reynist hærri en vænst var, er al­gengt að markaðurinn krefjist hærri ávöxtunar­kröfu á slíkum bréfum, sem þýðir um leið að verð bréfanna lækkar. Skulda­bréfa­jár­festar virðast vera endur­meta vaxtalækkunar­ferlið og verð­leggja nú meiri líkur á að vextir haldist hærri lengur en áður var talið. Veltan í helstu flokkum bendir jafn­framt til þess að þetta hafi ekki bara verið einstök til­fallandi við­skipti, heldur breiðari endur­verðlagning á markaði.