Er­lendir seðla­bankar hafa dregið veru­lega úr eign sinni á bandarískum ríkis­skulda­bréfum í kjölfar stríðsins við Íran, sam­kvæmt um­fjöllun Financial Times. Verðmæti bandarískra ríkis­skulda­bréfa sem opin­berir aðilar geyma hjá Seðla­banka New York hafa lækkað um 82 milljarða dala frá 25. febrúar og eru nú komin niður í 2,7 billjónir dala, sem er lægsta staða frá árinu 2012. Sam­kvæmt FT bendir þessi þróun til þess að seðla­bankar og önnur opin­ber stjórn­völd hafi verið að selja bandarísk ríkis­skulda­bréf til að verja eigin gjald­miðla og styðja við hag­kerfi sín á sama tíma og hækkandi olíu­verð hefur sett mörg ríki undir þrýsting. Sér­stak­lega eigi þetta við um lönd sem reiða sig á olíu­inn­flutning og hafi orðið fyrir miklum áhrifum eftir lokun Írans á Hormússundi. Megin­ástæðan virðist vera sú að hækkandi olíu­verð og sterkara gengi Bandaríkja­dals hafi gert stöðu margra inn­flutnings­ríkja erfiðari. Þegar olía hækkar í verði í dollurum veikjast margir gjald­miðlar enn frekar og hækkun olíu­verðs skilar sér af meiri þunga inn í inn­lenda verð­myndun. Í slíkri stöðu hafa seðla­bankar í sumum ríkjum gripið til inn­gripa á gjald­eyris­markaði, sem felur gjarnan í sér sölu á dollara­tengdum eignum. Meg­han Swi­ber, vaxta- og skulda­bréfasér­fræðingur hjá Bank of America, segir í sam­tali við FT að „er­lendir opin­berir aðilar séu að selja ríkis­skulda­bréf“. Brad Set­ser hjá Council on For­eign Relations telur að meðal þeirra ríkja sem lík­lega hafi selt bandarísk ríkis­skulda­bréf séu olíu­inn­flytj­endur á borð við Tyrk­land, Ind­land og Taíland, sem hafi þurft að mæta hærri olíu­reikningum í dollurum. FT bendir sér­stak­lega á Tyrk­land í þessu sam­hengi. Sam­kvæmt opin­berum gögnum hefur seðla­banki Tyrk­lands selt er­lend ríkis­skulda­bréf að and­virði 22 milljarða dala úr gjald­eyris­forða sínum frá 27. febrúar, deginum áður en árásirnar á Íran hófust. Set­ser telur lík­legt að veru­legur hluti þeirra eigna hafi verið bandarísk ríkis­skulda­bréf. Sér­stök gögn frá seðla­bönkum Taílands og Ind­lands sýna einnig að gjald­eyris­forði hafi verið seldur frá upp­hafi stríðsins, þótt ekki liggi skýrt fyrir hvort þar hafi verið um að ræða sölu á ríkis­skulda­bréfum eða dollara­innstæðum. Þróunin kemur á sama tíma og bandaríski skulda­bréfa­markaðurinn er þegar undir þrýstingi vegna ótta fjár­festa við að átökin í Miðaustur­löndum geti aukið verðbólguþrýsting. Ávöxtunar­krafa á bæði tveggja ára og tíu ára bandarískum ríkis­skulda­bréfum hefur því hækkað í þessum mánuði, sem hækkar fjár­mögnunar­kostnað bandaríska ríkisins og jafn­framt fyrir­tækja og heimila. Sumir grein­endur benda á að eigna­safn er­lendra seðla­banka í bandarískum ríkis­skulda­bréfum dragist gjarnan saman þegar dollarinn styrkist, þar sem þeir reyni þá að endur­jafna eignasöfn sín og verja eigin gjald­miðla. Aðrir telja þó að nýjustu gögnin bendi fremur til þess að opin­berir aðilar séu bein­línis að safna lausafé í skugga aukinnar markaðsóvissu. Stephen Jones, fjár­festingar­stjóri hjá Aegon Asset Mana­gement, segir sam­kvæmt FT að gögnin bendi til þess að opin­berir aðilar séu í raun að „fylla á stríðs­kistuna“ með því að inn­leysa ríkis­skulda­bréf. Með öðrum orðum séu þeir að draga til sín vara­sjóði á óvissutímum. FT bendir þó á að ekki sé víst að allur sam­drátturinn endur­spegli hreina sölu. Hluti eignanna gæti hafa verið fluttur frá Seðla­banka New York til annarra vörslu­aðila. Engu að síður telja grein­endur að salan sem birtist í gögnum Seðla­bankans sé at­hyglis­verð, ekki síst í ljósi þess að markaðurinn fyrir bandarísk ríkis­skulda­bréf er nú um þre­falt stærri en hann var síðast þegar sam­bæri­legt sölu­mynstur sást árið 2012. Um­fjöllun FT bendir einnig á að opin­berir er­lendir aðilar hafi á undan­förnum árum smám saman verið að dreifa gjald­eyris­forða sínum frá Bandaríkja­dal og bandarískum ríkis­skulda­bréfum. Sú þróun hafi gert er­lenda einka­fjár­festa enn mikilvægari á markaðinum. Nýjasta salan sé því ekki aðeins viðbragð við stríði og hækkandi olíu­verði, heldur hug­san­lega hluti af stærri þróun þar sem er­lendir seðla­bankar draga úr vægi bandarískra skulda­bréfa í vara­sjóðum sínum.