Bandaríkja­dalur hefur gefið eftir nær allan þann styrk sem hann sótti á fyrstu vikum Íran stríðsins, eftir að fjár­festar hafa dregið úr veðmálum um frekari styrkingu. Vonir um að sam­komu­lag náist í deilunni hafa dregið úr stöðu bandaríkja­dals sem öruggrar hafnar, á sama tíma og at­hygli markaða hefur í auknum mæli beinst að mögu­legum vaxtalækkunum vestan­hafs. Bandaríkja­dalur styrktist snemma í átökunum þegar óvissa jókst á mörkuðum. Sam­kvæmt frétt Financial Times hefur bandaríkja­dalur lækkað um 2,3 pró­sent frá toppi sínum seint í mars gagn­vart körfu helstu gjald­miðla og stefnir í versta mánuð sinn frá því í ágúst. Evran hefur jafn­framt unnið til baka nær allt það sem hún tapaði í upp­hafi átakanna. Sam­kvæmt viðmæ­lendum blaðsins hefur batnandi trú á frið­sam­legri niður­stöðu dregið úr fyrri styrk bandaríkja­dalsins, sem að hluta byggðist á því að bandaríska hag­kerfið væri til­tölu­lega varið fyrir lang­varandi orku­skelli á heims­vísu. Á sama tíma hefur aukin áhættusækni á mörkuðum stutt við gjald­miðla ný­markaðs­ríkja á kostnað bandaríkja­dalsins. Meera Chandan, sem stýrir alþjóð­legri gjald­eyris­greiningu hjá JP­Morgan, segir þetta vera skýrt merki um slökun. JP­Morgan hefur í kjölfarið tekið upp á ný ráð­leggingar um að veðja gegn bandaríkja­dalnum, meðal annars í þágu ástralska dalsins. Þótt olíu­verð hafi um skamma hríð farið í 100 dali tunnan í vikunni vegna óvissu um næstu skref í viðræðum Bandaríkjanna og Írans, hefur sveifla á mörkuðum al­mennt minnkað. Að mati margra fjár­festa er samnings­leiðin áfram lík­legasta niður­staðan. Við­skiptin á gjald­eyris­markaði bera þess einnig merki að fjár­festar hafi bakkað frá veðmálum um sterkari bandaríkja­dal. Svo­kölluð þriggja mánaða áhættu­vik í evru-bandaríkja­dal við­skiptum, sem sýna hvort markaðurinn hallast frekar að hækkun eða lækkun gengisins, höfðu á stríðstímanum færst greini­lega bandaríkja­dalnum í vil en eru nú nær hlut­laus. Sam­hliða þessu hefur markaðurinn horft í auknum mæli til mis­munandi vaxta­horfa í Bandaríkjunum og Evrópu. Hærra orku­verð er talið geta kallað á vaxta­hækkanir í Evrópu, á meðan fjár­festar telja mögu­legt að Seðla­banki Bandaríkjanna lækki vexti síðar á árinu. Sú sam­setning hefur vegið á móti bandaríkja­dalnum. Sam­kvæmt gögnum sem Financial Times vísar til hefur bandaríkja­dalur tapað gagn­vart öllum helstu gjald­miðlum í þessum mánuði, að japanska jeninu undan­skildu. Gjald­miðlar sem urðu illa úti í upp­hafi átakanna, þar á meðal suður­kóreska vonin og suðurafríski randinn, hafa hins vegar styrkst um meira en 2 pró­sent. Geof­frey Yu, markaðs­ráðgjafi hjá BNY, segir endur­reisn gjald­miðla ný­markaðs­ríkja greini­lega eiga sér stað á kostnað bandaríkja­dalsins og styðja þá mynd að áhættu­vilji fjár­festa sé að aukast á ný. Hann segir fjár­festa jafn­framt vera að snúa sér aftur að gjald­miðlum þar sem vextir eru hærri, enda hafi væntingar um vaxtalækkanir í Bandaríkjunum aukið áhuga á slíkum við­skiptum. Að mati sjóðs­stjóra og grein­enda sem blaðið ræddi við mun bandaríkja­dalur áfram standa frammi fyrir mót­vindi jafn­vel þótt átökunum linni. Þar nefna þeir meðal annars minnkandi traust vegna ófyrir­sjáan­legrar stefnumótunar í Hvíta húsinu og vilja er­lendra fjár­festa til að draga úr vægi bandarískra eigna í eignasöfnum sínum. Stóru fjárfestingarbankarnir á Wall Street gera nú ráð fyrir að evran styrkist áfram á næsta ári og fari í 1,20 bandaríkjadali úr 1,175 nú. Þá er pundinu spáð hækkun í 1,38 bandaríkjadali úr 1,35 nú. Roger Hallam hjá Vangu­ard segir alla þróun til veikari bandaríkja­dals til lengri tíma litið, þótt fram­vinda átakanna muni ráða mestu um skammtíma­hreyfingar.