Stjórn Orku­veitu Reykja­víkur leggur til að greiddur verði 4,5 milljarða króna arður til eig­enda á árinu 2026 vegna rekstrarársins 2025, þar af er 1 milljarður settur með fyrir­vara. Reykja­víkur­borg á um 93,5% hlut í Orku­veitunni á móti 5,5% hlut Akraneskaupstaðar og tæplega 1% hlut Borgarbyggðar. Til­lagan kemur fram sam­hliða birtingu árs­reiknings sam­stæðunnar fyrir 2025, þar sem Orku­veitan lýsir góðri af­komu þrátt fyrir veru­legt áfall í tekjum vegna greiðslu­falls hjá stórum orku­kaupanda undir lok árs. Hagnaður af rekstri sam­stæðunnar nam 11,5 milljörðum króna á árinu, saman­borið við 9,3 milljarða árið áður. Heildar­af­koman nam 23 milljörðum króna, sem er um­tals­verð bæting milli ára. Rekstrar­tekjur voru 68,4 milljarðar króna og rekstrar­hagnaður fyrir af­skriftir (EBITDA) 40,3 milljarðar, sem endur­speglar áfram sterka grunn­fram­legð í starf­seminni. Í árs­lok námu eignir sam­stæðunnar 537,9 milljörðum króna og eigið fé 282,3 milljörðum, og eigin­fjár­hlut­fallið var 52,5%. Þetta gefur til kynna trausta fjár­hags­stöðu en jafn­framt að reksturinn krefjist sí­fellt meira fjár­magns vegna mikilla inn­viða­fjár­festinga. Á árinu 2025 námu fjár­festingar 39,2 milljörðum króna, nánast í takt við áætlanir. Veltu­fé frá rekstri var á sama tíma 30,5 milljarðar króna, sem undir­strikar að fjár­festingarþörf er áfram stór hluti af fjár­streymi sam­stæðunnar. Stærsta óvissa félagsins tengist mótaðilaáhættu vegna raf­orkusölu til iðnaðar. „Mála­rekstur blasir við að óbreyttu” Orku­veitan greinir frá því að Norðurál hafi dregið stór­lega úr ál­bræðslu á Grundar­tanga í október 2025 og boðað greiðslu­fall á raf­magns­reikningum, þrátt fyrir samnings­bundna greiðslu­skyldu. Í inn­gangi stjórnar­for­manns og for­stjóra í árs­reikningi segir að ágreiningur við Norðurál sé kominn á það stig að hann muni að óbreyttu enda fyrir gerðar­dómi og að „mála­rekstur blasir við að óbreyttu”. Í inn­ganginum er því lýst hvernig Norðurál dró úr fram­leiðslu í október 2025 og boðaði greiðslu­fall á raf­magns­reikningum þrátt fyrir samnings­bundna greiðslu­skyldu. Þar er tekið fram að Orku­veitan hafi brugðist við tekju­fallinu með sam­drætti í rekstri og fjár­festingum og að mála­rekstur blasi við að óbreyttu. Í skýrslu stjórnar kemur jafn­framt fram að nýir orkusölu­samningar við Norðurál, gerðir í apríl 2025, séu um minni orku á hærra verði og til skemmri tíma, auk þess sem áhætta vegna flutnings­kostnaðar hafi verið færð til mótaðila.