Jón Finn­boga­son, fram­kvæmda­stjóri Stefnis, sendi eig­endum sjóða félagsins bréf í byrjun vikunnar sam­hliða birtingu árs­reiknings Stefnis. Í bréfinu segir hann að þrátt fyrir mót­vind á inn­lendum hluta­bréfa­markaði hafi rekstur margra félaga gengið vel og fjár­magni hafi verið skilað út með bæði endur­kaupum og arði. Jón segir jafn­framt að þróun ís­lenska hag­kerfisins skipti miklu máli fyrir fram­haldið og að sú þróun muni mótast af jafn­vægis­leit milli verðbólgu, vaxta­stigs og hag­vaxtar. „Þrátt fyrir aukna óvissu á sumum sviðum hefur hag­kerfið sýnt tölu­verða seiglu og grunn­stoðir þess eru áfram sterkar. Í eignastýringu Stefnis hefur áfram verið lögð áhersla á að bregðast við breyttu efna­hags­um­hverfi með virku eigna­vali og breiðri áhættu­dreifingu,“ skrifar Jón. Út­lit er fyrir að hátt vaxta­stig verði þrálátara en vonir hafa staðið til. Í af­komu­kynningum félaga í kaup­höllinni má merkja um­fjöllun um þróun launa­kostnaðar sem er um­fram það sem sjá má í löndum sem við berum okkur saman við. „Ef launa­breytingar halda áfram eins og verið hefur sl. ár þá er viðbúið að við munum áfram búa við hátt vaxta­stig. Þá hafa stjórn­völd sett á nýja skatta og breytt skatt­lagningu fyrir­tækja með stuttum fyrir­vara, sem erfitt er að bregðast við í áætlana­gerð.“ Jón segir að til að bregðast við þessum aðstæðum ríði á að aðhalds verði gætt í ríkis­fjár­málum á næstunni. „Ríkis­stjórn Kristrúnar Frosta­dóttur aug­lýsti í byrjun árs 2025 eftir til­lögum að leiðum til að spara í opin­berum rekstri og hag­ræða í ríkis­rekstri. Fram­takið var gott en minna hefur frést af hag­ræðingarað­gerðum sem þetta út­spil skapaði væntingar um. Það er okkar von að bæði sveitarfélög og ríkis­valdið setji saman sér­stakan „stop-to-do“ lista yfir verk­efni sem ekki eru nauð­syn­leg eða aðrir geta betur sinnt. Ellegar mun ekki takast að loka þeim halla sem er á rekstri sam­eigin­legra sjóða okkar allra um þessar mundir,“ skrifar Jón. Rekstur Stefnis gekk vel á síðasta ári. Í lok árs 2025 voru eignir í virkri stýringu hjá Stefni um 379 milljarðar króna, sem var 43 milljörðum krónum meira en í upp­hafi árs og nemur 12,8% hækkun á árinu. Hækkunin skýrist að mestu af inn­flæði í ný­stofnaða sjóði ásamt ávöxtun á árinu. Að lokum þakkar Jón það traust sem fjár­festar sýna Stefni með því að treysta því fyrir því að fjár­festa sparnað þeirra. „Við tökum því hlut­verki mjög al­var­lega,“ skrifar Jón að lokum. Sjá einnig Hagstætt verð lykil­at­riði í endur­kaupum