Árið 2024 var ákveðið að setja erlenda starfsemi inn í stefnu Landsvirkjunar. Stefnan kveður á um að árið 2035 verði 100 MW í eigu fyrirtækisins erlendis, sem jafngildir einni Hvammsvirkjun, og 350 MW árið 2045. Er þá miðað við að um 10% af innkomu Landsvirkjunar komi frá erlendri starfsemi. Í dag horfir Landsvirkjun til ýmissa fjárfestingarkosta erlendis. Stærsta verkefnið sem Landsvirkjun er með til skoðunar er vatnsaflsvirkjunin Tasersiaq í suðvesturhluta Grænlands. Virkjunin er á stærð við Kárahnjúkavirkjun eða um 700 MW, með möguleika á stækkun í 1.000 MW. Til samanburðar var uppsett afl allra virkjana á Íslandi rúm 3.000 MW árið 2024, þar af var Landsvirkjun með um 2.200 MW. „Þetta Grænlandsverkefni er búið að vera uppi á og af borðum fram og til baka í um 15 ár. Grænlendingar hafa verið að skoða það að fara í þennan virkjunarkost, bjóða hann út og svona, og það hefur bara gengið hægt, eins og gengur,“ segir Kristján Guðmundsson, forstöðumaður erlendra verkefna hjá Landsvirkjun. Landsvirkjun stendur nú í viðræðum ásamt tveimur stórum orkufyrirtækjum en liggja þarf fyrir hver muni kaupa orku virkjunarinnar, t.d. álver eða gagnaver, enda er almennt lítil orkuþörf á Grænlandi. Viðbúið er að ferlið muni taka nokkurn tíma en á Grænlandi, eins og á Íslandi og víðar í heiminum, tekur yfirleitt langan tíma að fá tilskyld leyfi svo hægt sé að reisa virkjanir. Þá má nefna vindorkuverkefni á Nýfundnalandi en verkefnið kom á borð Landsvirkjunar fyrir ekki svo löngu síðan. Stórt vindorkufyrirtæki í Norður-Ameríku hafði verið að þróa það verkefni með það í huga að framleiða grænt ammoníak með vindorkunni. Erfiðlega gekk þó fyrir þann aðila að finna kaupendur að ammoníakinu og ákvað hann því að selja sig út. Um er að ræða um 150 MW virkjun sem stendur eftir en til samanburðar verður vindorkuverið Vaðölduver sem Landsvirkjun vinnur að því að reisa með uppsett afl upp á 120 MW. „Þannig þeir fóru að svipast um eftir einhverjum sem hefðu mögulega áhuga á því og við ásamt samstarfsaðila á svæðinu höfum verið að skoða að ganga inn í það. Þetta er bara áframhaldandi samtal og samningaviðræður á þessu svæði,“ segir Kristján. Til viðbótar við verkefnin á Grænlandi og Nýfundnalandi komu nýverið á borð Landsvirkjunar verkefni í Skotlandi og á Írlandi. Um er að ræða svokallaðar dæluvirkjanir en ólíkt hefðbundnum vatnsaflsvirkjunum, þar sem vatni er hleypt niður úr stöðuvatni í gegnum túrbínur, er einnig stöðuvatn fyrir neðan virkjunina sem hægt er að dæla upp úr eftir því hver staðan í orkukerfinu er. Nánar er fjallað um málið í Viðskiptablaðinu , sem kom út í morgun. Áskrifendur geta nálgast fréttina í heild hér .