Árið 2024 var ákveðið að setja erlenda starfsemi inn í stefnu Landsvirkjunar. Stefnan kveður á um að árið 2035 verði 100 MW í eigu fyrirtækisins erlendis, sem jafngildir einni Hvammsvirkjun, og 350 MW árið 2045. Er þá miðað við að um 10% af innkomu Landsvirkjunar komi frá erlendri starfsemi. Landsvirkjun horfir einna helst til vatnsafls-, vindorku- og jarðvarmavirkjana á Grænlandi og í Kanada. Kristján Guðmundsson, forstöðumaður erlendra verkefna hjá Landsvirkjun, segir það hafa verið eðlilegt fyrsta val að horfa til Grænlands og Kanada þar sem aðstæður eru að ákveðnu leyti svipaðar og hér á landi, auk þess sem Landsvirkjun hafði myndað sterk viðskiptasambönd á þeim svæðum. Fyrirtækið sé þó með augun opin fyrir tækifærum á öðrum svæðum. Hann tekur fram að fyrst og fremst séu viðskiptaforsendur ráðandi við val á verkefnum auk þess sem íslensk verkefni eru alltaf í forgangi. „Við förum aldrei í verkefni erlendis sem er ekki að minnsta kosti álíka áhugavert og verkefni á Íslandi hvað varðar áhættu og ávöxtun. Auðvitað þyrfti arðsemin að vera meiri heldur en verkefni á Íslandi, enda er þetta fjarri heimahögum og áhættan mögulega aðeins meiri,“ segir Kristján. Þá er áhersla lögð á samvinnu við heimamenn, enda þekki þau aðstæður betur, t.d. hvað varðar pólitíkina. „Ef það er heimaaðili sem er viljugur til að taka slíkar ákvarðanir með sitt eigið fé, þá er það ákveðið grænt ljós fyrir okkur hvað varðar áhættu. Þannig það eru alltaf samskipti við samstarfsaðila og heimafólk, enda skiptir það svo miklu máli alveg eins og á Íslandi. Ef samtalið og sátt er ekki til staðar þá er ekki hægt að fara af stað.“ Fyrirtækið er sífellt að skoða möguleikann á nýjum verkefnum. Um er að ræða verkefni sem eru komin mislangt á leið og er í upphafi talað um þróunarfræ. „Þetta þróast áfram. Við skoðum einhver fræ og þau fara að líta betur og betur út. Það verður síðan að þróunarverkefni sem við kaupum okkur inn í. Svo verður það að framkvæmdaverkefni einhverju síðar þegar búið er að skrifa undir samninga eða einhverri vörðu hefur verið náð sem tryggir í rauninni framtíð verkefnisins. Þá er hægt að taka ákvörðun um stóru fjárfestingarnar,“ segir Kristján. Nánar er fjallað um málið í Viðskiptablaðinu . Áskrifendur geta nálgast fréttina í heild hér .