Árið 2024 var ákveðið að setja erlenda starfsemi inn í stefnu Landsvirkjunar. Samkvæmt stefnunni er miðað við að um 10% af innkomu Landsvirkjunar komi frá erlendri starfsemi. Í dag horfir Landsvirkjun til ýmissa fjárfestingarkosta erlendis, þar á meðal vindorkugarð á Nýfundnalandi og stóra vatnsaflsvirkjun á Grænlandi. Kristján Guðmundsson, forstöðumaður erlendra verkefna hjá Landsvirkjun, segir að fyrirtækið sé sífellt að skoða möguleikann á nýjum verkefnum. Um er að ræða verkefni sem eru komin mislangt á leið og er í upphafi talað um þróunarfræ sem síðar verða að þróunarverkefnum og loks framkvæmdarverkefnum, þar sem ákvörðun er tekin um stóru framkvæmdirnar. Að sögn Kristjáns hefur tilkostnaðurinn verið takmarkaður hingað til og hefur Landsvirkjun ekki keypt hlut í líkum verkefnum, þó það liggi fyrir að fyrirtækið muni fjárfesta á þann hátt, t.a.m. á Nýfundnalandi. „En meðan þetta er enn að fara frá því að vera fræ yfir í þróunarverkefni, þá erum við aldrei að tala um meira heldur en 5-10 milljónir dollara sem er fjárfest í hvert verkefni. En svo aftur á móti þegar það er tekin endanleg fjárfestingarákvörðun þá getur það verið töluvert mikið meira og jafnvel ekkert minna en hér á Íslandi þegar verið er að tala um að virkja í Hvammi eða annars staðar. Það eru tugir ef ekki hundruð milljarða sem þarf að fjármagna og einhver hluti af því er eigið fé sem Landsvirkjun leggur þá fram í þessi verkefni,“ segir Kristján. Eins og áður segir er horft til þess að um 10% af innkomu Landsvirkjunar komi frá erlendri starfsemi. Spurður hvort umsvifin gætu verið enn meiri segir Kristján að það muni koma í ljós. „Landsvirkjun sem orkufyrirtæki þjóðarinnar tekur náttúrulega mjög varleg skref og allt hugsað og rannsakað mjög vel, enda stórar upphæðir alltaf í öllu sem að við gerum. 10% er eitthvað sem fyrirfram mætti ætla að væri réttlætanlegt eða eðlilegt, þetta er stærð sem er ekki hægt að hundsa en á sama tíma ekki eitthvað sem félagið stendur og fellur með,“ segir Kristján. „Svo fer það bara eftir því sem okkur miðar áfram í gegnum árin að endurmeta það. Á hverjum tíma er auðvitað hægt að endurmeta og stilla stefnuna, og segjum að eftir 10 ár sé reynslan jákvæðari en ætlað var þá getur stjórn þess tíma tekið þá ákvörðun að uppfæra stefnuna. Það gæti verið eðlileg ákvörðun á þeim tíma ef þetta lofar allt góðu.“ Nánar er fjallað um málið í Viðskiptablaðinu . Áskrifendur geta nálgast fréttina í heild hér .