Stríðsátökin í Íran hafa valdið mestu röskun á olíu­flutningum í sögu heims­markaðarins, að mati Alþjóða­orkumála­stofnunarinnar, IEA. Fram kemur í nýrri skýrslu stofnunarinnar að fram­leiðsla á hráolíu muni dragast saman niður í lægsta stig í fjögur ár. Sam­kvæmt IEA hafa olíu­fram­leiðendur við Persaflóa dregið úr fram­leiðslu um að minnsta kosti 10 milljónir tunna á dag þar sem siglingar um Hormússund eru nær ófærar. Gert er ráð fyrir að heims­fram­leiðsla dragist saman um 8 milljónir tunna á dag í mars, sem jafn­gildir rúm­lega 7 pró­senta sam­drætti frá því magni sem var fram­leitt í febrúar, um 107 milljónir tunna á dag. „Stríðið í Miðaustur­löndum veldur mestu truflun á fram­boði í sögu alþjóð­legs olíu­markaðar,“ segir í skýrslu IEA en Financial Times greinir frá. Sjá einnig Icelandair og Eim­skip finna fyrst fyrir högginu Tunnan af Brent-hráolíu hefur verið í kringum 100 dali á ný í dag eftir tölu­verðar hækkanir síðustu tvo daga. Mestur sam­dráttur hefur orðið í Írak, Katar, Kúveit, Sam­einuðu arabísku fursta­dæmunum og Sádi-Arabíu. IEA bendir þó á að aukin fram­leiðsla í Kasakstan og Rúss­landi, auk meiri fram­leiðslu utan OPEC+, geti að hluta vegið upp á móti sam­drættinum við Persaflóa. Sádi-Arabía og Sam­einuðu arabísku fursta­dæmin hafa jafn­framt reynt að bregðast við stöðunni með því að beina út­flutningi í auknum mæli um hafnir utan Persaflóa. IEA segir að dag­legur út­flutningur Sáda um vestur­hafnir landsins hafi náð meti 9. mars, eða 5,9 milljónum tunna á dag. Til saman­burðar hafi flæðið um þá leið að meðaltali verið 1,7 milljónir tunna á dag á þessu ári. Þá hafi Adnoc, ríki­solíufélag Abu Dhabi, lestað að meðaltali 2,4 milljónir tunna á dag í Fujairah-höfn dagana 4. til 9. mars. Höfnin tengist leiðslu frá fram­leiðslu­svæði félagsins í Habs­han og stórri hráolíu­geymslu í Al-Mandous. IEA segir að áhrifin á heims­markaðinn muni ráðast af því hversu lengi átökin dragast á langinn. Stofnunin spáir nú að olíu­fram­boð í heiminum aukist að meðaltali um 1,1 milljón tunna á dag á árinu 2026. Það er mun lægri spá en stofnunin gaf út fyrir mánuði þegar hún taldi fram­leiðslu­aukningu geta orðið 2,4 milljónir tunna á dag á þessu ári. Sjá einnig „Lokun sundsins ávallt verið þeirra helsta vopn“