Heims­markaðsverð á olíu hefur hækkað tölu­vert frá því að átökin í Miðaustur­löndum hófust fyrir tæpum tveimur vikum og hafa átökin af­leidd áhrif á Ís­land. Verðbólguáhrifin eru vissu­lega óum­flýjan­leg og eins og Við­skipta­blaðið hefur fjallað um á síðustu dögum hefur hækkandi olíu­verð tölu­verð áhrif á aðra þætti samfélagsins. Hækkandi olíu­verð hefur einnig áhrif á skipa­flutninga til og frá Ís­landi en ólíkt flug­félögum verja skipafélög sig með svo­kölluðu olíu­gjaldi (BAF). Hilmar Pétur Val­garðs­son, fram­kvæmda­stjóri rekstrar­sviðs Eim­skips, segir hærra olíu­verð auðvitað hafa áhrif á rekstur félagsins. „Við erum að sjá 40 til 50% hækkun á olíunni sem við erum að taka, sem hefur um­tals­verð bein áhrif,“ segir Hilmar Pétur en Eim­skip er stór kaupandi skipa­olíu, svart­olíu og dísilolíu. Eim­skip birtir olíu­gjaldið opin­ber­lega á mánaðar­fresti. Þetta gjald er greitt af við­skipta­vinum og ver félagið þannig í eðli­legum markaðsaðstæðum fyrir sveiflum í olíu­verði. Við­skipta­vinir Eim­skips njóta þá einnig góðs af því þegar olíu­verð lækkar því þá lækkar gjaldið. „Við erum bara að meta stöðuna núna dag frá degi þar sem þetta er mjög skörp hækkun,“ sagði Hilmar í sam­tali við Við­skipta­blaðið á mánu­daginn. Að sögn Hilmars hafa skipafélög úti í heimi verið að bregðast við með sér­stöku neyðarálagi á við­skipta­vini og er Eim­skip að meta og greina stöðuna. Hilmar segir jafn­framt að olíu­birgjar félagsins hafi ekki gefið til kynna að það þurfi að hafa áhyggjur af skorti á olíu. „Eins og staðan er í dag eru áhyggjurnar mest um að þetta verði lang­varandi átök. Birgðirnar voru ágætar fyrir,“ segir Hilmar að lokum. Áskrifendur geta lesið ítarlega umfjöllun Viðskiptablaðsins um olíuverð og áhrifin á Ísland hér.