Íslandspóstur ohf. hagnaðist um 581 milljón króna árið 2025, samanborið við 187 milljóna hagnað árið áður og var afkoma félagsins jákvæð sjötta árið í röð. Ársreikningur félagsins var birtur í dag. Aukinn hagnað má alfarið rekja til 756 milljóna króna söluhagnaðar vegna sölu félagsins á 19,2% hlut í Internet á Íslandi hf. (ISNIC), skráningarstofu landshöfuðlénsins .is, á síðasta ári til SÍA IV, framtakssjóðs í rekstri Stefnis. Sjá einnig Kaupa meiri­hluta í Inter­neti á Ís­landi hf. „Sala hlutabréfa á árinu í hlutdeildarfélagi leiddi til jákvæðrar afkomu en rekstrartap var af reglulegri starfsemi,“ segir í skýrslu stjórnar í ársreikningi Íslandspósts. 9,4% tekjusamdráttur Tekjur Íslandspósts drógust saman um 9,4% milli ára og námu 6,9 milljörðum króna á árinu 2025, samanborið við rúmlega 7,6 milljarða árið áður. EBITDA-hagnaður félagsins dróst saman um meira en helming milli ára og fór úr 822 milljónum í 385 milljónir. EBIT-afkoma var neikvæð um 252 milljónir króna, samanborið við 262 miljóna rekstrarhagnað á árinu 2024. Eignir Íslandspósts námu tæplega 6 milljörðum króna í árslok 2025. Eigið fé var um 4,4 milljónir króna og skuldir 1,5 milljarðar. Í tilkynningu er bent á að félagið hafi ekki verið með neinar vaxtaberandi skuldir í árslok 2025. „Tölurnar sýna að þær breytingar sem við höfum gert á starfseminni á undanförnum árum hefur verið að skila sér,“ segir Þórhildur Ólöf Helgadóttir , forstjóri Íslandspósts. „Pósturinn tengir saman fólk, fyrirtæki og samfélög um allt land og kröfur til félagsins eru miklar, t.d. hvað varðar þjónustu og vöruúrval en að sama skapi á félagið að skila að skila hagnaði og viðunandi arðsemi á hlutafé eigandans.“ Hún segir hagræðingu og bætta þjónustu hafa verið lykilorð í rekstrinum sem oft og tíðum sé í ölduróti breytinga. „Ég leyfi mér að vitna í orð fjármálaráðherra, Daða Más Kristóferssonar, sem hann lét falla í blaðaviðtali 21. febrúar síðastliðinn þegar hann sagði að sennilega hefði ekkert fyrirtæki í eigu ríkisins gengið í gegnum aðrar eins breytingar og Pósturinn á undanförnum árum.“ Segir skorta skilning á þjónustu Póstsins Íslandspóstur er alþjónustuaðili eftir útnefningu ríkisins og Þórhildur segir að sem slíkum beri honum lögum samkvæmt að halda uppi póstþjónustu um land allt. „Ríflega 10% af tekjum Íslandspósts koma frá ríkinu þar sem ríkið greiðir fyrir þjónustu í strjálbýli þar sem 7% íbúa landsins búa og engin samkeppni ríkir. Þetta fyrirkomulag þekkist í póstþjónustu um allan heim og auk þess má nefna að greiðslur frá ríkinu eru ekki einungis bundnar við póstþjónustu, heldur þekkist slíkt í fleiri atvinnugreinum, eins og á sviði fjölmiðla og flugfélaga. Í fjölmiðlum er það gjarnan gefið í skyn, og jafnvel fullyrt, að hið opinbera ausi fjármunum í Íslandspóst og þeim fjármunum væri betur varið í annað. Það virðist ekki vera skilningur fyrir því að þau þjónustugæði sem fyrirtækinu ber að framleiða og afhenda sem alþjónustuaðili, útnefndur af ríkinu, kostar fjármuni og eðli málsins samkvæmt skal greiða fyrir þau gæði,“ segir Þórhildur.