Donald Trump Bandaríkja­for­seti heldur blaða­manna­fund í beinni áður en hann sest til há­degis­verðar með stjórn Kenne­dy Center í Was­hington. Viðburðurinn hefst 15:45 að ís­lenskum tíma en Trump hefur ekki greint nánar frá efni fundarins en allt bendir til að stríðið við Íran verði þar í brenni­depli. Blaða­manna­fundurinn kemur í kjölfar þess að átökin hafa harðnað enn frekar. Bret­land og Evrópu­sam­bandið hafa rætt leiðir til að opna Hor­mússund á ný, eftir að siglingar þar röskuðust veru­lega, og bresk stjórn­völd hafa meðal annars nefnt mögu­lega notkun fjar­stýrðra tundur­dufla­leitar­skipa. Trump hefur jafn­framt sagt að hann og ráðgjafar hans hafi leitað til sjö ríkja um að­stoð við að tryggja siglinga­leiðina. Á sama tíma hefur Ís­rael sagt að land­hernaðarað­gerðir séu hafnar í Líbanon á meðan árás í nágrenni flug­vallarins í Dúbaí olli röskun á flugi þar í morgun. Olíu­fjár­festar fylgjast grannt með, enda hefur óróinn í Persaflóa og Hor­mússundi haft bein áhrif á orku­verð og alþjóð­legar birgða­keðjur. Vænta má þess að Trump fari yfir þessa stöðu á fundinum, ekki síst í ljósi þess að Hvíta húsið hefur síðustu daga beint aukinni at­hygli að öryggi siglinga, olíu­flutningum og alþjóð­legum stuðningi við að­gerðir Bandaríkjanna á svæðinu