Stjórnvöld eru með til skoðunar að færa Hvalfjarðargöng, Reykjanesbraut og Suðurlandsveg inn í áformað innviðafélag ríkisins og hefja þar gjaldtöku. Þetta kemur fram í greinargerð frumvarps um stofnun innviðafélags sem lagt var fram á Alþingi í gær. Fjármálaráðuneytið áætlar að framkvæmdakostnaður þeirra þriggja samgönguverkefna sem horft er til að fyrirhugað innviðafélag ríkisins taki að sér – Sundabraut, Fljótagöng og fjármögnun Ölfusárbrúar - verði rúmir 190 milljarðar króna. „Til að fjárhagsleg skilyrði haldi þyrfti ríkissjóður að leggja 75 milljarða króna framlög til félagsins til að verkefnin þrjú uppfylltu skilyrðin,“ segir í greinargerð frumvarps um innviðafélagið sem lagt var fram á Alþingi í gær. Umrædd fjárhagsleg skilyrði vegna þessara verkefna fela í sér að uppfyllt verði lágmarkseiginfjárþörf og skuldaþekja sem talið er að fjárfestar horfi til við lánveitingar og fjármögnun verkefna. Miða við að gjaldtaka í Hvalfjarðargöngum hefjist 2028 Til að mæta þessum tugmilljarða kostnaði hafa stjórnvöld skoðað að afhenda félaginu Vaðlaheiðargöng og Hornafjarðarfljót en þar er nú þegar verið að innheimta eða stendur til að innheimta veggjöld. Jafnframt hefur verið til skoðunar að Hvalfjarðargöng verði sett inn í félagið og að tekin verði upp innheimta veggjalda í göngin. Sjá einnig Mót­mæla gjald­töku í Hval­fjarðargöngum „Áætlunin gerði ráð fyrir hóflegum veggjöldum miðað við forsendur um metinn greiðsluvilja samkvæmt rannsóknum. Innheimta veggjalda í Hvalfirði myndi hefjast 2028 á sama tíma og tvöföldun ganganna yrði sett í undirbúning og framkvæmd hafin 2030. Með slíkum ráðstöfunum lækkar þörf á framlagi frá ríkinu verulega, eða í 27 milljarða króna.“ Sanngirni að rukka á öllum helstu leiðum Ráðuneytið segir að mögulegt sé að fleiri þegar byggð mannvirki verði skoðuð í þessu samhengi, til að mynda Reykjanesbraut og Suðurlandsveg. „Með slíkum aðgerðum væri innheimta veggjalda á öllum helstu leiðum til og frá höfuðborgarsvæðinu sem í fælist ákveðin sanngirni þar sem byrðum yrði dreift á vegfarendur hvar sem þeir byggju eða störfuðu. Ekki liggur fyrir nákvæm greining á því hvað framlag ríkisins myndi lækka við slíka ráðstöfun en ljóst er að hún getur lækkað verulega.“ Áformað er að innviðafélagið sjái um fjármögnun og eignarhald stærri samgönguframkvæmda, s.s. vegna jarðganga og sambærilegra flýtiframkvæmda. Með félaginu er m.a. horft til þess að liðka fyrir aðkomu lífeyrissjóða og annarra stórra stofnanafjárfesta að fjármögnun slíkra verkefna. Sjá einnig Stefna að stofnun inn­viðafélags ríkisins Gert er ráð fyrir að fjármögnun félagsins og verkefna þess byggi á fjórum stoðum, þ.e. árlegu fjárframlag samkvæmt samningi við ríkið til næstu ára, lánsfjármögnun, t.d. með ríkisábyrgð eða endurlánum, gjaldtöku af samgöngumannvirkjum og fjárfestingu lífeyrissjóða og annarra fjárfesta. „Miðað er að félagið verði stofnað sem opinbert hlutafélag þar sem ríkissjóður verður eini eigandi þess a.m.k. í upphafi. Ekki er útilokað að hlutahafar verði fleiri á seinni stigum, t.a.m. lífeyrissjóðir eða aðrir fagfjárfestar, og yrði þá um almennt hlutafélag að ræða,“ segir í greinargerðinni. Sjá einnig Áhugi er­lendis frá á fjár­mögnun inn­viða­verk­efna