Það kom mörgum á óvart þegar sam­runa­viðræðum Ís­lands­banka og Skaga var slitið áður en form­legur sam­runa­samningur lá fyrir hjá stjórnum félaganna til samþykktar. Ís­lands­banki sagði niður­stöður greininga úr ferlinu, þróun á markaðsvirði félaganna og væntar auknar eigin­fjárkröfur Seðla­banka Ís­lands vegna eignar­halds banka á tryggingafélagi hafa kallað á breytingar á gagn­gjaldi til að verja hags­muni hlut­hafa bankans en ekki hafi náðst sam­komu­lag um þær. Jón Guðni Ómars­son, banka­stjóri Ís­lands­banka, segir það klár­lega hafa verið von­brigði að ekki skyldi nást saman um verð. „Við sáum tölu­verða sam­legð í þessu og tækifæri bæði í sókn og vörn. En svo þarf náttúru­lega bara að ná saman um verð og það tókst ekki,“ segir Jón Guðni. Hann segir að út­spil Seðla­bankans um mögu­lega aukna eigin­fjárkröfu vegna eignar­halds banka á tryggingafélagi hafi klár­lega haft áhrif á viðræðurnar. Í árs­reikningi bankans er vísað til um­ræðu­skjals Seðla­bankans um könnunar- og mats­ferlið, svo­nefnt SREP, og tekið fram að nýjar upp­lýsingar um mögu­legar breytingar gætu aukið eigin­fjárkröfur vegna áhættu af eignum í tryggingafélögum. Eins og Við­skipta­blaðið greindi frá hefði eigin­fjár­binding Ís­lands­banka hækkað um 4,6 milljarða við það að eignast Skaga miðað við um­ræðu­skjalið. Markaðsverðið í við­skiptunum var 40 milljarðar króna en eigið fé Skaga­sam­stæðunnar var í kringum 24 milljarðar króna í árs­lok 2025. Binding Ís­lands­banka í við­skiptunum var í kringum 20 milljarðar króna en ef fyrir­huguð hug­mynd Seðla­bankans um viðbótar­kröfu yrði inn­leidd hefði bindingin getað færst upp í 24,6 milljarða króna. „Þetta hafði klár­lega áhrif enda kallaði þetta á mjög mikla aukningu á eigin fé. Breytingin er þó enn í um­ræðu­ferli og við teljum að þetta muni ekki hafa eins mikil áhrif, en þó tölu­verð. Þetta kallaði á aukið sam­tal að okkar mati hvað varðar verð og skipti­gengi, en því miður náðum við ekki saman,“ segir Jón Guðni. Þar sem til stóð að greiða fyrir Skaga með út­gáfu nýrra hluta hefði sam­einað félag setið á tölu­verðu um­fram eigið fé, til viðbótar við það fé sem Ís­lands­banki situr á nú þegar. Um­fram eigið fé, reiknað út frá stöðu CET1-hlut­falls og mið­punkti stjórn­enda­auka, nam 36 milljörðum króna í árs­lok 2025. Frá áramótum hafði bankinn síðan þegar keypt eigin bréf fyrir 4 milljarða króna fram að birtingu árs­upp­gjörs, þannig að um­fram­eigið fé hafði lækkað í 32 milljarða króna á þeim tíma. Spurður hvað hann sjái fyrir sér að gera við allt þetta um­fram­eigið fé segir Jón Guðni bankann aðal­lega horfa á endur­kaup og vöxt er­lendis. Nánar er fjallað um málið í Viðskiptablaðinu. Áskrifendur geta lesið fréttina í heild hér og blaðið hér