Ein umsókn hefur borist Fiskistofu um leyfi til veiða á bláuggatúnfiski úr veiðiheimild til handa Íslandi frá Alþjóðatúnfiskráðinu á þessu ári. Það er nú til skoðunar hjá Fiskistofu um þessar mundir hvort umsóknin uppfylli öll skilyrði. Samkvæmt umsókninni er um það að ræða að leiguskip verði fengið til veiðanna. Íslensk lög heimila það sem og reglugerðir Evrópusambandsins en ekki virðist með öllu ljóst hvort það yrði í samræmi við samþykktir Alþjóðatúnfiskráðsins, ICCAT. Mikilvægt að veiðar innlendra hefjist Hlutverk ICCAT er að tryggja sjálfbærni túnfisks í Atlantshafi með vísindalegri ráðgjöf og stjórnun veiða. Ísland gerðist aðili að ráðinu 30. október árið 2002. Þar eru fyrir 54 önnur aðildarríki. ICCAT úthlutar aðildarríkjum túnfiskkvóta á hverju ári. Í nóvember á síðasta ári ákvað ICCAT á fundi sínum í Sevilla á Spáni heildarkvóta fyrir austuratlantshafs- og vesturatlantashafstúnfisk upp á 3.081 tonn fyrir þann fyrrnefnda og 48.403 tonn fyrir þann síðarnefnda. Mikið er undir að veiðar hefjist af innlendunum aðilum til þess að nýta þennan verðmæta kvóta sem fellur Íslendingum í skaut, sem eru rúm 254 tonn. Í desember síðastliðinum var heildsöluverð á kílói af bláuggatúnfiski í kringum 22-25 dollarar í Japan (2.750-3.130 ÍSK) en um 47 dollarar á Spáni (5.900 ÍSK). Íslensk lög heimila erlent skip Sumarið 2022 samþykkti Alþingi bráðabirgðaákvæði í lögum um stjórn fiskveiða sem heimilar íslenskum útgerðum að taka á leigu erlent skip til allt að sex mánaða hvert almanaksár, til veiða og vinnslu samkvæmt veiðiheimildum Íslands á austur-atlantshafsbláuggatúnfiski innan og utan íslenskrar fiskveiðilandhelgi. Ákvæðið gildir til ársloka 2028 en áhöld eru uppi um það hvort það stangist á við samþykktir ICCAT og sé því í reynd innihaldslaust á meðan ekki verða gerðar breytingar á samþykktum ICCAT. Engar beinar veiðar síðan 2016 Íslensk skip hafa ekki stundað beinar veiðar á bláuggatúnfiski í að verða tíu ár. Árin 2014 til 2016 gerði Vísir hf. í Grindavík línuskipið Jóhönnu Gísladóttur GK til veiða djúpt suður af landinu. Samtals veiddust 294 fiskar á þessum þremur árum. Veiðarnar stóðu ekki undir sér og var þeim sjálfhætt. Af og til veiðist túnfiskur við landið sem meðafli með öðrum veiðum. Pétur H. Pálsson hjá Vísi í Grindavík sker túnfiskinn. Vísir stundaði túnfiskveiðar á árunum 2014-2016. MYND/JÓN STEINAR SÆMUNDSSON Fiskifréttir sögðu frá því í janúar síðastliðnum að samkvæmt úthlutun sem ákveðin var á ársfundi Atlantshafs túnfiskveiðiráðsins (ICCAT) hefur veiðiheimild Íslands verið aukin úr 224 tonnum í 254,13 tonn eða um 13% á yfirstandandi ári. Óhefðbundnar leiðir í veiðum Þar sem engar veiðar hafa farið fram undanfarin áratug er sú hætta talin fyrir hendi að kvótaúthlutanir ICCAT til Íslands stöðvist og kvótinn flytjist til annarra aðildarríkja sem stunda þessar veiðar. Einn íslenskur aðili hefur nú lagt inn umsókn fyrir veiðum á bláuggatúnfiski á þessu ári. Hyggst hann fara óhefðbundnar leiðir í veiðunum. Umsóknin er, eins og áður segir, í vinnslu hjá Fiskistofu. Verður nánar greint frá þessu verkefni síðar í Fiskifréttum.