Verðbólguálag á skulda­bréfa­markaði hækkaði eftir vaxtaákvörðun Seðla­bankans. Það eru skýr skila­boð um að vaxta­hækkunin hafi ekki dregið úr verðbólguótta markaðarins, að minnsta kosti ekki til skemmri og miðlungslangs tíma. Saman­burður á verðbólguálagi á þriðju­daginn og í dag sýnir að markaðurinn verðlagði meiri verðbólguáhættu eftir vaxtaákvörðunina, einkum á bréfum með gjald­daga eftir þrjú og hálft til fimm ár. Álagið hækkaði mest á 3,5 ára og 4 ára bréfum en minna á lengri bréfum. Á 7 ára bréfum lækkaði það lítil­lega. Verðbólguálag er í ein­földu máli sá munur sem er á ávöxtunar­kröfu óverð­tryggðra og verð­tryggðra ríkis­bréfa með sam­bæri­legan gjald­daga. Það er oft notað sem vís­bending um þá verðbólgu sem markaðsaðilar telja lík­lega yfir líftíma bréfanna, að teknu til­liti til áhættuþátta og lausa­fjárálags. Þegar álagið hækkar felur það al­mennt í sér að markaðurinn krefst meiri verndar gegn verðbólgu eða gerir ráð fyrir meiri verðbólgu en áður. Verðbólguálagið fór í vikunni úr 4,40% í 4,47% á 3,5 ára bréfum, úr 4,36% í 4,42% á 4 ára bréfum og úr 4,26% í 4,29% á 5 ára bréfum. Á 10 ára bréfum var breytingin hins vegar lítil, úr 3,94% í 3,95%. Það sem vekur mesta at­hygli í þessum mælingum er að hækkunin kemur eftir að Seðla­bankinn herti taum­hald peninga­stefnunnar. Í stað þess að verðbólguálag lækkaði eftir vaxta­hækkunina hækkaði það á flestum þeim bréfum sem mest segja um verðbólgu­væntingar næstu ára. Ýmsir aðrir þættir hafa þó einnig áhrif á álagið eins og átökin í Íran með tilheyrandi hækkun á olíuverði. Þetta er því ekki peningastefnunni að kenna en setur nefndina þó í verri stöðu fyrir næstu vaxtaákvörðun ef álagið heldur áfram að aukast. Jafn­framt sést að verðbólguálagið er hæst á skemmri og miðlungslöngum bréfum en lægra á lengri bréfum. Það bendir til þess að fjár­festar óttist meiri verðbólgu á næstu árum en geri ráð fyrir að hún hjaðni síðar. Þrátt fyrir það er álagið áfram mjög hátt á öllum helstu gjald­dögum, eða nálægt 4% og þar yfir, sem er tölu­vert yfir verðbólgu­mark­miði Seðla­bankans. Niður­staðan af þessum hreyfingum er sú að skulda­bréfa­markaðurinn sendir Seðla­bankanum óþægi­leg skila­boð. Vaxta­hækkunin virðist ekki hafa dregið úr verðbólguótta markaðarins. Þvert á móti virðist markaðurinn telja að verðbólguáhætta sé enn tals­verð, sér­stak­lega á næstu þremur til fimm árum. Það dregur úr trúverðug­leika þess að verðbólga fari hratt niður og bendir til þess að markaðurinn sjái fyrir sér þrálátari verðbólgu en Seðla­bankinn vill ná fram.