Verðbólguálag á skulda­bréfa­markaði til lengri tíma hefur hækkað frá vaxtaákvörðun Seðla­bankans. Verðbólguálag á skulda­bréfa­markaði hefur hækkað á langa endanum frá því í byrjun febrúar, á sama tíma og álagið er heldur lægra á styttri hluta kúrfunnar. Þróunin bendir til þess að markaðurinn verð­leggi nú meiri verðbólgu, eða meiri verðbólguóvissu, til lengri tíma, þótt álagið hafi mýkst lítil­lega á styttri endanum Verðbólguálag er munurinn á ávöxtunar­kröfu óverð­tryggðra og verð­tryggðra skulda­bréfa með sam­bæri­legan líftíma. Þessi munur endur­speglar í megin­at­riðum hvað markaðurinn er að verð­leggja sem meðal­verðbólgu yfir tíma­bilið (auk þess sem í honum getur falist ákveðið óvissu- eða áhættuálag). Hærra verðbólguálag þýðir að markaðurinn gerir ráð fyrir hærri verðbólgu eða verðbólguóvissu. Álagið liggur nú al­mennt á bilinu 3,9–4,1% á 3–10 ára tíma­bili. Á 3–5 ára endanum hefur álagið lækkað lítil­lega frá byrjun mánaðarins og er nú nálægt 4,0–4,1%. Á 8–10 ára endanum hefur álagið hins vegar færst upp. Þar er álagið nú í kringum 3,93–3,94% á 8–9 árum og um 3,90% við 10 ár, sem er hærra en það var fyrr í febrúar (þá var 10 ára álag nær 3,84–3,85%). Hvað þýðir þetta? Þegar verðbólguálag hækkar á langa endanum eftir vaxtaákvörðun þýðir það í reynd að markaðurinn er varfærnari um verðbólgu­horfur til lengri tíma en áður. Skammtíma­myndin virðist hins vegar aðeins mýkri, sem getur endur­speglað að væntingar um verðbólgu næstu ár hafi ekki versnað í sama mæli og langtíma­horfurnar. Von er á verðbólgutölum frá Hag­stofu Ís­lands á morgun. Sjá einnig Ekkert fararsnið á verðbólgudraugnum