Hlutabréfaverð Alvotech hefur lækkað um 8,8% í viðskiptum dagsins og stendur nú í 395 krónum á hlut. Markaðsvirði líftæknifyrirtækisins nemur 130 milljörðum króna og er því rétt yfir einum milljarði dala. Gengi Alvotech, sem er þrískráð á Íslandi, í Bandaríkjunum og Svíþjóð, lækkaði talsvert eftir opnun bandaríska markaðarins í dag. Alls hefur hlutabréfaverð Alvotech nú lækkað um 37% í ár og hefur aldrei verið lægra frá skráningu árið 2022. Sjá einnig Hriktir enn veru­lega í tekju­stoðum Al­vot­ech Alvotech birti ársuppgjör fyrir árið 2025 á miðvikudaginn síðasta. Eins og Viðskiptablaðið fjallaði um lækkuðu tekjur félagsins af vöru- og þjónustusölur félagsins umtalsvert milli ára. Í kjölfar uppgjörsins lækkaði fjárfestingarbankinn Barclays verðmatið sitt á Alvotech úr 5 í 4 dali á hlut, eins og Innherji greindi frá í dag. Róbert Wessman, stofnandi og stjórnarformaður Alvotech, verður í ítarlegu viðtali í Viðskiptablaðinu sem kemur út á morgun. Fréttin var uppfærð með nákvæmum tölum um markaðsvirði Alvotech. Fyrri upplýsingar miðuðu við upplýsingar Yahoo Finance.