Ís­félagið hagnaðist um 2,8 milljarða króna eftir skatta á árinu 2025, saman­borið við 2,1 milljarð króna árið áður. Rekstrar­tekjur námu 27,4 milljörðum króna og jukust um ríf­lega 5,5 milljarða milli ára. Rekstrar­hagnaður nam 7,9 milljörðum króna og EBITDA var 10,1 milljarður króna, sem sam­svarar 36,8% EBITDA-fram­legð. Í kynningu félagsins kemur fram að betri af­koma milli ára skýrist fyrst og fremst af háu af­urða­verði og góðri makríl­vertíð síðasta sumar. Stefán Friðriks­son for­stjóri segir af­komuna hafa verið ágæta og nefnir þar einnig góð afla­brögð Sól­bergs ÓF, frysti­togara félagsins, ásamt ágætum gangi í veiðum og vinnslu á makríl og síld. Fjórði árs­fjórðungur var sér­stak­lega sterkur. Þá námu rekstrar­tekjur 8,1 milljarði króna, hagnaður 1,7 milljörðum króna og EBITDA 3,6 milljörðum króna. Arð­semi eigin fjár var 9,6% á fjórðungnum, en 3,9% á árinu í heild. Á móti sterkum rekstri vó þungt að bandaríkja­dalur veikist veru­lega á árinu, en hann er upp­gjörs­mynt félagsins. Það hafði um­tals­verð áhrif á fjár­magns­gjöld, sem námu sam­tals 26,7 milljónum dala, þar af var hreinn gengis­munur 13,6 milljónir dala. Í árs­reikningnum sést að hrein fjár­magns­gjöld jukust þannig veru­lega milli ára og námu jafn­virði um 3,4 milljarða króna. Efna­hagur félagsins stækkaði á árinu. Heildar­eignir námu 108,4 milljörðum króna í lok árs, þar af voru fasta­fjár­munir 89,2 milljarðar og veltu­fjár­munir 19,2 milljarðar. Eigið fé nam 71 milljarði króna og skuldir og skuld­bindingar 37,4 milljörðum króna. Eigin­fjár­hlut­fallið var 65,5% í árs­lok, saman­borið við 70,8% ári áður. Nettó vaxta­berandi skuldir námu 19,2 milljörðum króna. Fjár­festingar voru einnig um­tals­verðar á árinu. Ís­félagið keypti upp­sjávar­skip frá Skot­landi sem fékk nafnið Heima­ey VE, lauk stækkun mjöl­verk­smiðju félagsins í Vest­manna­eyjum, tók nýja frysti­geymslu á Þórs­höfn í notkun og setti upp nýjan laus­frysti í frysti­húsinu í Eyjum. Þá var félagið endur­fjár­magnað í byrjun árs með 220 milljóna evra sam­bankaláni. Ís­félagið kom einnig að frekari fjár­mögnun Kald­víkur í gegnum Austur Holding. Félagið lagði til 341 milljón norskar krónur í hluta­fjáraukningu Kald­víkur, sem var bæði í formi eigin­fjár­fram­lags og breytan­legra hlut­haf­alána. Í árs­reikningnum kemur fram að bók­fært virði eignar­hlutar Ís­félagsins í Austur Holding sé 66,3 milljónir dala, þótt markaðsvirði undir­liggjandi hlutar í Kald­vík hafi verið tölu­vert lægra í árs­lok. Stjórn­endur telja þó að bók­fært virði standi undir sér og að ekki sé þörf á virðis­rýrnun. Í skýrslu stjórnar kemur fram að félagið telji sig áfram fjár­hags­lega afar sterkt til að takast á við frekari fjár­festingar og tækifæri á komandi árum. Þar er jafn­framt bent á að bruninn í verk­smiðju Primex í október muni hafa lítil áhrif á fjár­hag Ís­félags, þar sem bæði eignir og rekstur dóttur­félagsins séu vel tryggð. Horfur á yfir­standandi ári eru þó blendnar. Félagið segir loðnu­vertíðina í vetur hafa gengið ljómandi vel og markaði fyrir af­urðir séu af því góða, auk þess sem kvóta­aukning er í norsk-ís­lenskri síld í haust. Á móti komi mikill niður­skurður í makríl­kvóta. Þá varar for­stjórinn við því að miklar hækkanir á veiðigjöldum og kol­efnis­gjöldum muni hafa neikvæð áhrif á reksturinn strax á þessu ári og enn meiri áhrif á næsta ári, þegar af­slættir vegna veiði­gjaldsins verða að mestu felldir niður og skatturinn leggst á sjávarút­vegs­fyrir­tækin af fullum þunga. „Ef veiðigjöld ársins 2026, án tíma­bundinna af­slátta, eru reiknuð fyrir Ís­félagið m.v. afla ársins 2025, að öllu öðru óbreyttu, hækka veiðigjöldin árið 2026 um tæp­lega hálfan milljarð króna saman­borið við veiðigjöld ársins 2025, eða úr 1,0 milljarði króna í 1,5 milljarð króna. Kol­efnis­gjöld félagsins hafa hækkað um yfir 60% á milli áranna 2024 og 2025, úr 226 milljónum króna í 372 milljónir króna. Ég vek at­hygli á því að þessir skattar eru langtum hærri hér á landi en í sam­keppnislöndum okkar ef þeir eru á annað borð þar fyrir hendi,“ segir Stefán. Hann bætir við að skatta­hækkanir muni óhjákvæmi­lega minnka getu og draga úr áhuga á að fjár­festa í sjávarút­vegi á Ís­landi, að öllu öðru óbreyttu. Slíkt muni leiða til lægra skatt­spors greinarinnar til framtíðar. „Færa má fyrir því rök að laga­setningin, sem út­reikningur og álagning veiði­gjaldsins byggir á, standist ekki grund­vallar­reglur og áskilnað stjórnar­skrárinnar um skatt­lagningu.“ Stjórn leggur til að greiddur verði 2,57 króna arður á hlut á árinu 2026 vegna rekstrarársins 2025.