Bera, móðurfélag Öl­gerðarinnar, hagnaðist um 2,1 milljarð króna á fjár­hagsárinu sem lauk 28. febrúar síðastliðinn, saman­borið við 2,4 milljarða króna árið áður. Vöru­sala jókst hins vegar um 7,3% milli ára og nam 49 milljörðum króna. Rekstrar­hagnaður fyrir af­skriftir, EBITDA, var nær óbreyttur á milli ára, 5 milljarðar króna saman­borið við 5 milljarða króna árið áður. Í stjórn­enda­upp­gjöri félagsins kemur fram að rekstrarþróunin hafi verið misjöfn eftir starfsþáttum. Inn­koma Gæða­baksturs og Kjarna­vara hafi styrkt sam­stæðuna veru­lega undir lok ársins á meðan rekstur Iceland Spring hafi vegið þungt á móti. Bein neikvæð áhrif Iceland Spring á EBITDA námu 310 milljónum króna á árinu miðað við fyrra ár og segir félagið tolla­setningu í Bandaríkjunum hafa haft mest áhrif þar. Á fjórða árs­fjórðungi, sem nær frá desember til febrúar­loka, jukust um­svifin enn meira. Vöru­sala nam 12,3 milljörðum króna og jókst um 17,8% frá sama tíma­bili árið áður. EBITDA stóð þó nær í stað og var 1,2 milljarðar króna saman­borið við 1,2 milljarða króna árið áður. Hagnaður eftir skatta á fjórðungnum nam 314 milljónum króna og lækkaði um 140 milljónir króna milli ára. Skýringin á þessari þróun er meðal annars sú að Gæða­bakstur og Kjarna­vörur komu aðeins inn í sam­stæðuna 1. desember og eru því inni í tölum alls fjórða árs­fjórðungsins, sem skekkir saman­burð við fyrra ár. Félagið segir EBITDA-fram­lag þessara tveggja félaga hafa numið 213 milljónum króna á fjórðungnum, en það hafi að hluta vegið upp lakari af­komu í öðrum rekstrar­einingum, sér­stak­lega hjá Iceland Spring. Jón Þor­steinn, for­stjóri Beru, segir í til­kynningunni að sterk inn­koma Gæða­baksturs og Kjarna­vara undir­striki mikilvægi þess að hafa margar öflugar stoðir undir rekstrinum. Hann segir nýtt skipu­lag sam­stæðunnar undir merkjum Beru eiga að styðja við stefnu félagsins og skapa betri for­sendur fyrir frekari vexti og skil­virkari rekstri. Af­koman dróst einnig niður af hærri fjár­magns­liðum. Þeir námu 1,1 milljarði króna á árinu, saman­borið við 761 milljón króna árið áður. Félagið segir aukna lántöku vegna kaupanna á Gæða­bakstri og Kjarna­vörum skýra hækkunina, ásamt verri af­komu Endur­vinnslunnar, sem er hlut­deildar­félag og hafði 69 milljóna króna neikvæð áhrif. Félagið greinir jafn­framt frá því að skipu­lagi sam­stæðunnar hafi verið breytt veru­lega. Á hlut­hafa­fundi í febrúar var samþykkt að breyta nafni Öl­gerðarinnar í Beru hf. Sam­hliða var nafnið Öl­gerðin fært yfir á nýtt félag, Öl­gerðin Egill Skalla­gríms­son ehf., sem mun sinna fram­leiðslu, inn­flutningi, sölu og markaðs­setningu drykkjar­vara. Mark­miðið með breytingunum er að skýra hlut­verk ein­stakra rekstrar­eininga og samnýta betur stoðþjónustu, svo sem inn­kaup, flutninga, gæðamál, mann­auðsmál, tölvu­kerfi og fjár­mál. Eftir breytingarnar eru Kjarna­vörur, Gæða­bakstur, Collab, Iceland Spring, Danól, Mýrar fast­eignafélag og Öl­gerðin systur­félög í eigu Beru, sem jafn­framt sinnir sam­eigin­legri stoðþjónustu fyrir sam­stæðuna. Í rekstrinum eru þó áfram ákveðin vanda­mála­svæði. Collab-út­flutningur hafði neikvæð EBITDA-áhrif upp á 369 milljónir króna á árinu og hafa heildaráhrifin frá upp­hafi numið 688 milljónum króna. Félagið segir viðtökur í Þýska­landi hafa verið undir áætlunum, á meðan Dan­mörk og Austurríki gangi sam­kvæmt áætlun. Fyrir­hugað sé að sækja nýtt fjár­magn í út­flutnings­félagið Collab á yfir­standandi ári til áfram­haldandi markaðssóknar. Danól náði heldur ekki væntingum á árinu en stjórn­endur segja horfur fyrir þetta ár góðar, meðal annars með til­komu nýrra vöru­merkja og nýs vöru­húss, sem eigi að skila sér í betri rekstri þegar líður á árið. Á móti draga stjórn­endur fram öfluga vöruþróun. Þar nefnir félagið sér­stak­lega vín­gos­drykkinn P*rn, sem náði 17% hlut­deild hjá ÁTVR árið 2025 þrátt fyrir að hafa komið á markað í júní, auk Kristall+ með koffíni, D-víta­míni og sinki. Einnig er vísað til áfram­haldandi sam­starfs við danska fram­leiðandann Tu­borg um vöruþróun. Horfur fyrir nýtt rekstrarár eru jákvæðar sam­kvæmt stjórn­endum. Af­komu­spá Beru fyrir fjár­hagsárið 2026 gerir ráð fyrir EBITDA á bilinu 6,1 til 6,5 milljarðar króna. Það er tals­vert yfir niður­stöðu síðasta árs og endur­speglar meðal annars full ársáhrif af inn­komu Gæða­baksturs og Kjarna­vara, auk væntinga um meiri hag­ræðingu og bættan rekstur í nýju skipu­lagi sam­stæðunnar. Jón Þor­steinn segir þrátt fyrir óvissu í alþjóð­legu um­hverfi og óhagstæða þróun verðbólgu og vaxta hér á landi að spennandi tímar séu fram undan og að for­sendur séu fyrir áfram­haldandi traustum rekstri Beru.