Festi hagnaðist um 218 milljónir króna á fyrsta árs­fjórðungi ársins, saman­borið við 279 milljónir króna á sama tíma­bili í fyrra. Smásölufyrirtækið birti árshlutauppgjör eftir lokun Kauphallarinnar í dag. Rekstur félagsins var í takt við áætlanir stjórn­enda. Vöru­sala nam 40,1 milljarði króna og jókst um 6% milli ára. Fram­legð af vöru- og þjónustusölu nam 9,7 milljörðum króna og jókst um 5,8% á sama tíma. EBITDA nam 2,6 milljörðum króna á fjórðungnum og hækkaði um 3% frá fyrra ári. Fram­legðar­stig nam 24,3% og lækkaði um 0,1 pró­sentu­stig milli ára. „Rekstur félagsins gekk vel á árs­fjórðungnum og var í takt við áætlanir stjórn­enda. Heildar­tekjur jukust um 6,0% milli ára og jókst sala í flestum vöru­flokkum í magni milli ára,“ segir Ásta S. Fjeldsted, forstjóri Festi. Fjöldi af­greiðslna jókst um 1,4%, fjöldi seldra vara um 5,8% og fjöldi seldra elds­neytislítra um 18,5%, mest í sölu til stór­not­enda. Þá fjölgaði af­greiðslum í gegnum stafræna miðla um 13,3% milli ára. Krónan stærsti tekju- og hagnaðar­liðurinn Krónan var stærsta rekstrar­eining Festi á fjórðungnum. Tekjur Krónunnar námu 20,5 milljörðum króna og EBITDA 1,6 milljörðum króna. Hagnaður Krónunnar nam 711 milljónum króna á tíma­bilinu, saman­borið við 490 milljónir króna á sama tíma í fyrra. ELKO skilaði 107 milljóna króna hagnaði, saman­borið við 33 milljónir króna í fyrra. Tekjur ELKO námu 4,7 milljörðum króna og EBITDA 351 milljón króna. Lyfja skilaði 28 milljóna króna hagnaði, sem var lítil­lega minna en á sama tíma í fyrra þegar hagnaðurinn nam 31 milljón króna. Tekjur Lyfju námu 5,2 milljörðum króna. N1 var hins vegar rekið með 403 milljóna króna tapi á fjórðungnum, saman­borið við 102 milljóna króna tap á sama tíma í fyrra. Tekjur N1 námu 10,8 milljörðum króna en EBITDA lækkaði úr 760 milljónum króna í 444 milljónir króna milli ára. Í til­kynningu félagsins segir að N1 sé þó í sókn, þrátt fyrir að fram­legð hafi lækkað á fjórðungnum. Af­greiðslu­fjöldi hafi aukist um 16% milli ára og fjöldi nýrra elds­neytis­við­skipta­vina tvöfaldast. N1 appið hafi einnig laðað að fleiri við­skipta­vini og mars hafi verið met­mánuður í seldum lítrum í gegnum appið. Laun og aðföng hækka Laun og annar starfs­manna­kostnaður námu 5,7 milljörðum króna á fjórðungnum, saman­borið við 5,3 milljarða króna á sama tíma í fyrra. Annar rekstrar­kostnaður nam 2,1 milljarði króna og hækkaði um 90 milljónir króna milli ára. „Líkt og víðar í hag­kerfinu hefur launa­kostnaður og verð á aðföngum hækkað, en mark­vissar að­gerðir hafa að mestu vegið upp á móti þeim áhrifum,“ segir Ásta. Hún segir fjár­festingar í stafrænum lausnum og gagna­drifinni ákvarðanatöku áfram skila aukinni skil­virkni. „Notkun gervi­greindar og sjálf­virkni­væðingar í lykilþáttum rekstrarins hefur þegar haft jákvæð áhrif, þótt enn séu mörg tækifæri til frekari framþróunar,“ segir Ásta. Fyrsta skulda­bréfaút­gáfa félagsins Vaxta­berandi skuldir voru endur­fjár­magnaðar á fjórðungnum fyrir um 4,2 milljarða króna. Festi lauk sölu á nýjum verð­tryggðum skulda­bréfa­flokki að nafn­virði 4,2 milljarðar króna á 3,95% ávöxtunar­kröfu. Um var að ræða fyrstu skulda­bréfaút­gáfu félagsins. Félagið greiddi einnig 297 milljónir króna inn á önnur lán og keypti eigin bréf fyrir 563 milljónir króna. Hand­bært fé frá rekstri var neikvætt um 32 milljónir króna, en félagið segir ein­skiptisáhrif í rekstrar­tengdum eignum og skuldum skýra muninn milli ára. Eigið fé Festi nam 45 milljörðum króna í lok mars og eigin­fjár­hlut­fallið var 38,7%, saman­borið við 41,2% í lok síðasta árs. Félagið samþykkti arð­greiðslu upp á 2,2 milljarða króna í mars, sem var greidd til hlut­hafa 9. apríl. Horfur óbreyttar EBITDA-spá Festi fyrir árið 2026 er óbreytt og hljóðar upp á 16,5 til 17 milljarða króna. Ásta segir horfur ársins góðar þrátt fyrir óvissu í efna­hags­málum, hækkandi verðbólgu­spár og spennu í Mið-Austur­löndum. „Fram undan eru sumar­mánuðirnir sem jafnan eru um­svifa­mestir í rekstri sam­stæðunnar. Áfram verður leitað leiða til að sporna gegn hækkun vöru­verðs – og þar með verðbólgu – með bættum rekstri og lægra einingar­verði,“ segir Ásta.