Upp­gjör Festi á fyrsta árs­fjórðungi var undir væntingum Akkurs, sam­kvæmt nýrri greiningu fyrir­tækisins á upp­gjörinu. Festi hagnaðist um 218 milljónir króna á fjórðungnum, saman­borið við 279 milljónir króna á sama tíma í fyrra. Hagnaðurinn var jafn­framt langt undir spá Akkurs, sem hafði gert ráð fyrir 717 milljóna króna hagnaði. EBITDA nam 2,6 milljörðum króna, saman­borið við 2,5 milljarða króna í fyrra. Akkur hafði hins vegar spáð 2,9 milljarða króna EBITDA og var niður­staðan því um 305 milljónum króna undir væntingum. Í greiningu Akkurs segir að upp­gjörið hafi einkum verið undir væntingum vegna sla­krar af­komu N1 og hærri fjár­magns­gjalda en spá gerði ráð fyrir. Tekjur yfir væntingum en fram­legð undir Sala Festi nam 40,1 milljarði króna á fjórðungnum og jókst um 6% frá sama tíma í fyrra. Tekjurnar voru tæpum 2,9 milljörðum króna yfir spá Akkurs. Fram­legð nam hins vegar 9,7 milljörðum króna og var 253 milljónum króna undir væntingum. Fram­legðar­hlut­fallið var 24,3%, saman­borið við 26,9% í spá Akkurs og 24,4% á sama tíma í fyrra. Akkur segir að þessi munur skýrist nánast al­farið af meiri tekjum af elds­neytissölu en tölu­vert lægri fram­legð en gert hafði verið ráð fyrir. Greiningar­fyrir­tækið hafði búist við meiri tekju­sam­drætti í elds­neytissölu vegna breytinga á elds­neytis­gjöldum. Selt magn jókst hins vegar um 18%, sem dró úr tekju­sam­drættinum. N1 dró af­komuna niður Mestu von­brigðin í upp­gjörinu voru hjá N1, sam­kvæmt Akkri. EBIT N1 versnaði um 421 milljón króna milli ára og var starfsþátturinn rekinn með 386 milljóna króna tapi fyrir fjár­magns­liði og skatta á fjórðungnum. Akkur bendir á að þrátt fyrir að tekjur af elds­neytissölu hafi verið yfir væntingum hafi fram­legðin verið langt undir væntingum. Miklar sveiflur á olíu­markaði innan fjórðungsins hafi lík­lega haft veru­leg áhrif á af­komuna. Í greiningunni segir að olíu­verð í ís­lenskum krónum hafi nærri tvöfaldast frá upp­hafi fjórðungs til loka hans. Akkur telur að slíkar sveiflur ættu að jafnast út með tímanum og að af­koma N1 ætti því að styrkjast. Sjá einnig Hagnaður Festi dróst saman þrátt fyrir aukna sölu Krónan og ELKO í góðum gangi Á móti sla­kri af­komu N1 var góður gangur í Krónunni og ELKO. EBIT Krónunnar jókst um 294 milljónir króna milli ára og EBIT ELKO um 96 milljónir króna. Akkur segir ganginn í þessum tveimur einingum hafa verið „gríðar­lega góðan“ á fjórðungnum. Krónan er orðin langstærsti ein­staki starfsþáttur Festi og segir Akkur jákvætt að góður gangur haldi áfram þar. Yrkir bættu einnig af­komuna milli ára, en EBIT félagsins jókst um 60 milljónir króna. Af­koma Lyfju stóð hins vegar nánast í stað og EBIT lækkaði lítil­lega milli ára þrátt fyrir mikla tekju­aukningu. Áætlun ársins stendur Hrein fjár­magns­gjöld Festi námu 886 milljónum króna á fjórðungnum og voru 211 milljónum króna hærri en Akkur hafði spáð. Akkur segir að munurinn skýrist fyrst og fremst af því að greiningar­fyrir­tækið hafi ekki tekið nægi­lega vel til­lit til virkrar verðbólgu á fjórðungnum í mati sínu á fjár­magns­gjöldum. Af­skriftir voru einnig yfir væntingum og rekstrar­kostnaður lítil­lega hærri en Akkur gerði ráð fyrir. Samnings­bundnar launa­hækkanir og fjölgun stöðu­gilda hækkuðu launa­kostnað um 7,2% milli ára. Þrátt fyrir að upp­gjörið hafi verið undir væntingum hefur Festi ekki breytt af­komu­spá ársins. Félagið gerir áfram ráð fyrir að EBITDA verði 16,5 til 17 milljarðar króna á árinu 2026. Akkur bendir á að það þýði að EBITDA síðustu níu mánaða ársins þurfi að aukast um 3 til 7% til að áætlunin gangi eftir. „Upp­gjör undir væntingum sem skrifast að lang­mestu leyti á laka af­komu N1. Góður gangur hjá Krónunni og ELKO nær ekki að vega upp von­brigðin hjá N1. Þrátt fyrir að af­koma sé undir væntingum stendur af­komuáætlun ársins og árið í heild lítur því vel út,“ segir í niður­stöðu Akkurs. Verðlagning sjaldan verið hagstæðari Akkur metur heildar­virði Festi á 140 milljarða króna miðað við dagsloka­gengi í gær. Það jafn­gildir 8,4 földu EBITDA ársins 2026 miðað við mið­gildi áætlunar, eða 8,1 földu EBITDA þegar leiðrétt hefur verið fyrir virði órekstrar­tengdra eigna. EV/EBIT hlut­fallið er 12,9 miðað við áætlun Akkurs, eða 12,4 þegar leiðrétt er fyrir órekstrar­tengdum eignum. Akkur segir að verðlagning Festi hafi sjaldan verið hagstæðari á EV/EBITDA mæli­kvarða frá sam­einingu N1 og Festi árið 2018, þegar horft er til hlaupandi tólf mánaða og leiðrétt fyrir fjár­festingu í hlut­deildar­félögum.