OECD varar við því að verðbólga í Bandaríkjunum fari upp í 4,2% á þessu ári vegna hækkandi orku­verðs í kjölfar stríðsins í Miðaustur­löndum. Sam­kvæmt um­fjöllun Financial Times yrði það hæsta verðbólga meðal G7-ríkjanna. Í bráða­birgðamati OECD kemur fram að verðhækkanir á olíu og gasi muni þrýsta verðlagi upp víða um heim og jafn­framt veikja hag­vöxt ef truflanir á orkuút­flutningi frá svæðinu versna. OECD kallar sér­stak­lega eftir því að horft sé til hættunnar sem skapast ef átökin dragast á langinn, enda geti lang­varandi hækkun á orku­verði bæði aukið kostnað fyrir­tækja og ýtt undir verðbólgu hjá neyt­endum, sam­kvæmt nýju bráða­birgðamati OECD í dag. Sam­kvæmt FT reiknar OECD með að bandarísk verðbólga hækki úr 2,6% í fyrra upp í 4,2% á þessu ári. Jafn­framt sé búist við að hag­vöxtur í Bandaríkjunum hægi á sér í 2% á þessu ári og verði 1,7% árið 2027. Vaxandi verðbólguþrýstingur muni þar með skerða kaup­mátt heimila og draga úr þrótti í hag­kerfinu. Á heims­vísu telur OECD að hag­vöxtur fari úr 3,3% í fyrra niður í 2,9% árið 2026 áður en hann taki lítil­lega við sér á næsta ári. Fram kemur í um­fjölluninni að heims­bú­skapurinn hafi áður sýnt tölu­verðan styrk, meðal annars vegna mikillar fjár­festingar í gervi­greind og hækkana á hluta­bréfa­mörkuðum, en að sú mynd hafi breyst veru­lega eftir árásir Bandaríkjanna og Ís­raels á Íran í lok febrúar. OECD bendir á að Hor­mússund skipti þar lykilmáli, enda fari um fjórðungur allrar olíu sem flutt er sjó­leiðis um sundið og fimmtungur flutninga á fljótandi jarðgasi. Áhrifin tak­markast þó ekki við orku. Stofnunin bendir einnig á áhættu tengda áburði og öðrum hráefnum, þar sem Persaflóaríki séu stórir út­flytj­endur brenni­steins, helíums og bróms og gegni mikilvægu hlut­verki í alþjóð­legum að­fanga­keðjum. OECD hefur áður bent á að aukin verðbólga og hærri að­fanga­kostnaður geti dregið úr vexti og aukið áhættu á fjár­málamörkuðum. Í um­fjöllun FT segir jafn­framt að þessi þróun hafi þurrkað út þann jákvæða hag­vaxtar­auka sem áður hafði verið farinn að sjást í alþjóða­hag­kerfinu fyrr á árinu. OECD hafi áður séð fyrir sér að hag­vöxtur gæti orðið um 0,3 pró­sentu­stigum meiri en átökin í Miðaustur­löndum hafi eytt þeim bata. Verðbólgu­spá OECD fyrir G20-ríkin hefur einnig verið hækkuð veru­lega Nú er gert ráð fyrir 4% verðbólgu árið 2026, sem er 1,2 pró­sentu­stigum meira en stofnunin spáði í desember. Í Evrópu eru horfurnar einnig lakari en áður. OECD gerir ráð fyrir aðeins 0,8% hag­vexti á evru­svæðinu á þessu ári, áður en hann taki við sér í 1,2% á næsta ári.