Óðinn fjallaði um stöðu Kristrúnar Frostadóttur forsætisráðherra í Viðskiptablaðinu sem kom út í gær og fyrsta misserið í forsætisráðherratíð hennar, sem byrjaði alveg hreint ágætlega. Hún á hins vegar ekki sjö dagana sæla nú. Óveðurskýin hrannast upp í efnahagslífinu og þjóðin er að klofna vegna atkvæðagreiðlu um hvort við ætlum í aðlögunarviðræður við Evrópusambandið. Nú síðast í morgun komu tölur sem sýna að verðbólgan er komin í 5,4% og atvinnuleysið var 7,1% í febrúar. Þetta eru skelfilegar tölur. Hér á eftir er byrjunin á pistli Óðins. Mun Evrópu­sam­bandið eyði­leggja feril Kristrúnar? Kristrún Frostadóttir er líklega sá stjórnmálamaður sem hefur komið af mestu afli og öryggi inn í landsmálin frá því að ­Davíð Oddsson varð kjörinn formaður Sjálf­stæðis­flokksins árið 1991. Bæði tóku þau við völdum af óvinsælum vinstristjórnum sem voru búin að koma efnahagslífinu á vondan stað. Skattar voru háir, skuldir voru miklar og verðbólgudraugurinn var á sveimi. Ein fyrstu orð þeirra beggja í embætti voru að það þyrfti að hagræða í ríkis­rekstrinum. Kristrún kom á fót hagræðingarnefnd og óskaði eftir tillögum frá almenningi. En ólíkt hafast menn að. Undir forystu Davíðs lækkuðu ríkisútgjöldin árið 1992 um 2,8% á fyrsta fjárlagaári hans samkvæmt ríkisreikningi. Undir forystu Kristrúnar hækkuðu ríkisútgjöldin um 9% árið 2026 samkvæmt fjárlögum. *** Mikil fylgissveifla Það má segja að kosningabarátta Samfylkingarinnar hafi algjörlega misheppnast haustið 2024. Flokkurinn fékk aðeins 20,8% atkvæða eftir að Gallup mældi flokkinn mest með 30,9% vorið áður. Kristrún átti hins vegar mjög góða byrjun sem forsætisráðherra. Hún var létt í lund, skorinorð og með málin á hreinu. Enda fór fylgið á flug. Það fór hæst í 34,7% í júlí 2025 en síðan hefur það minnkað og minnkað og mældist 28,5% í febrúar. Það var fyrir vaxtahækkun og óskaplega vondar atvinnuleysistölur upp á 7,3%. Telja má að fylgisminnkunin eigi sér þrjár meginskýringar. 1) Þrálát verðbólga, háir vextir og atvinnuleysi, 2) miklar skattahækkanir á bíla fyrir venjulegt fólk og 3) Evrópusambands-misskilningurinn. Svo auðvitað margt annað, svo sem ­Flokkur fólksins, en ráðherrar flokksins nota hvert tækifæri til þess að vera úti að aka, þrátt fyrir ófærðina. Þetta kennir okkur það að fylgi Samfylkingarinnar er kvikt. Í næstu viku birtir Gallup fylgiskönnun sína fyrir mars og allar líkur er á því að fylgi Kristrúnar og Samfylkingarinnar fari niður 25-26%. Þá á Kristrún inni meira fylgistap vegna vaxtahækkunarinnar. Auk þess benti Ásgeir Jónsson seðlabankastjóri á það í Silfrinu á mánudaginn að hugsanlega væri von á annarri hækkun. Hér má sjá fylgi Samfylkingarinnar samkvæmt könnunum Gallup, fylgið í þingkosningunum í nóvember 2024 og spá Óðins næstu mánuði. Óðinn er fastur dálkur í Viðskiptablaðinu og fjallar um viðskipti, efnahagsmál og stjórnmál þegar mikið liggur við. Áskrifendur geta lesið pistilinn í fullri lengd .