Þórarinn V. Þórarinsson, fráfarandi stjórnarformaður Reita, sagði á aðalfundi fasteignafélagsins að fasteignaskattar hér á landi eigi sér enga hliðstæðu í nálægum ríkjum. Hann gagnrýndi þar sérstaklega álögur Reykjavíkurborgar sem hafi gengið lengst allra sveitarfélaga í þessum efnum. „Ég vona að fundarmenn fyrirgefi mér þótt mér djarfist svona um fasteignagjöldin, því þetta er langstærsti útgjaldaliður félagsins og umfangið fer einhvern veginn svo langt umfram það sem heilbrigð skynsemi ætti að leiða fram,“ sagði Þórarinn kveðjuávarpi sínu á aðalfundi Reita á miðvikudaginn. Þar fann hann einnig verulega að töfum í skipulagsferlinu og sagði félög eins og Reiti verða að fara fyrir kröfu um breytingar á opinberum leyfisveitingum svo að greitt verði fyrir framkvæmdum og biðtími styttur. Sömuleiðis verði borgin að falla frá „gölnum“ skipulagsskilmálum um verslunarhúsnæði á jarðhæðum flestra nýrra fjölbýlishúsa. Fasteignagjöld Reita námu tæplega 2,7 milljörðum króna í fyrra sem svarar til 14,8% af leigutekjum fasteignafélagsins sem námu 18,2 milljörðum króna. Þórarinn benti þó á að hlutfallið hafi hæst farið í 17% á árunum 2018 og 2019. „Það ber þess öll merki að stór hluti af eignum er í Reykjavík, en það ágæta sveitarfélag hefur gengið lengst allra sveitarfélaga í álagningu fasteignaskatta á atvinnuhúsnæði.“ Sjá einnig Þórarinn að hætta sem stjórnar­for­maður Reita Furðar sig á áformum Eyjólfs Fyrir nokkrum árum hafi ákveðin hagsmunasamtök vakið athygli á umfangi fasteignaskatta hér á landi. Þórarinn segir að nokkrir stjórnmálamenn virtust hafa áttað sig á því að óhóflegar álögur á atvinnuhúsnæði leiði af sér hærra verð á vöru og þjónustu og skerði samkeppnisstöðu innlendra aðila. „En svo bráði hratt af þeim og enginn stjórnmálamaður talaði lengur um endurskoðun fasteignaskatta. Og þó rek ég mig á einum; innviðaráðherra hefur hvatt sér hljóðs og sýnt frumvarpsdrög um breytingar á gjaldstofni fasteignaskatta? Til að lækka? Ó nei, til að auka álögur á framleiðslukostnað raforku um a.m.k. 5-6 milljarða á ári. Honum sýndist þetta vera fundið fé, eitthvað sem lengi hafi legið á glámbekknum og beðið þess að hirðusamur ráðherra tíndi upp og nýtti í þágu almennings.“ Sjá einnig Áformin verðbólgu­hvetjandi og bitni á almenningi Þórarinn sagði að þessar áformuðu nýju álögur muni vitaskuld hækka verð á raforku og valda almenningi og atvinnufyrirtækjum tilsvarandi búsifjum. „Það er eins og þessi einföldu sannindi séu ekki á margra vitorði, því áhyggjur ríkisstjórnar af hárri verðbólgu sýnast ekki trufla undirbúning af þessari nýju áformuðu skattahækkun.“ Biðu lengi eftir borginni og bíða nú eftir Skipulagsstofnun Í erindinu fjallaði Þórarinn talsvert um aukna áherslu Reita á þróunareignir og uppbyggingarverkefni. Til að lesa meira Hægt að er kaupa áskrift að Viðskiptablaðinu, Fiskifréttum og Frjálsri verslun hér. Verð frá 6.295 kr. á mánuði Kaupa áskrift