Tý hreinlega blöskraði þegar hann las aðsenda grein Ragnars Þórs Ingólfssonar, félags- og húsnæðismálaráðherra, í Morgunblaðinu. Ráðherrann afhjúpar yfirgripsmikið þekkingarleysi sitt á málaflokknum með greininni, og ætti það að vekja upp áhyggjur meðal landsmanna. Sem kunnugt er fékk Ragnar Þór á dögunum bloggarann Marínó G. Njálsson til að leiða starfshóp um nýtt húsnæðislánakerfi. Ragnar rekur ástæðuna fyrir skipun starfshópsins við upphaf greinar sinnar: „Íslendingar búa við einhver verstu lánakjör sem í boði eru á Vesturlöndum. Húsnæðislánakerfi okkar líkist meira því sem þekkist í ríkjum eins og Tyrklandi, Argentínu og Rússlandi en kerfi nágrannaríkja okkar.“ Það vekur athygli að Ragnar Þór nefnir Tyrkland í þessu samhengi, en hann hefur verið einn ötulasti talsmaður þess að Seðlabankinn taki upp sömu peningamálastefnu og Erdoğan, forseti Tyrklands, hefur reynt að þröngva upp á sinn seðlabanka – með hörmulegum afleiðingum. Látum það þó liggja milli hluta. Þetta er einfaldlega ekki rétt. Þegar leiðrétt hefur verið fyrir kostnaði vegna sértækrar skattheimtu, eiginfjárkröfum og öðrum séríslenskum álögum sést að álagning ofan á fjármagnskostnað í fasteignalánum er fyllilega sambærileg við það sem gerist hjá bönkum af sambærilegri stærðargráðu í nágrannaríkjum okkar. Vandinn felst í kostnaði skattheimtunnar sem lántakar standa að lokum straum af. Í fjármálaáætlun má jafnframt finna fyrirheit um enn frekari hækkun þessara skatta – sem sumir rekja til svonefnds hvalrekaskatts Þórðar Snæs Júlíussonar, fyrrum þingmanns og núverandi starfsmanns Samfylkingarinnar. Daði Már Kristófersson fjármálaráðherra viðurkenndi það í samtali við Morgunblaðið sem birtistá laugardag að hækkun bankaskattsins muni lenda á lántakendum. Væntanlega á það að sýna þörfina á því að ljúka aðlögunarviðræðum við Evrópusambandið á forsendum fyrirheita um lægri vexti á húsnæðislánum. *** Þá segir Ragnar í grein sinni að Íslendingar eigi að horfa til Danmerkur þegar kemur að húsnæðislánakerfinu. Í greininni segir: „Víðast hvar annars staðar eru húsnæðislán gjarnan fjármögnuð með öðrum hætti en hér þekkist. Heimilum bjóðast mun hagstæðari kjör í nágrannaríkjum. Í Danmörku eru húsnæðislán til dæmis gjarnan fjármögnuð með útgáfu sértryggðra skuldabréfa. Þetta fyrirkomulag hefur skilað Dönum frábærum kjörum á húsnæðislánum.“ Týr veltir því fyrir sér hversu langan tíma það muni taka tólf manna starfshóp undir forystu bloggarans Marínós að komast að þeirri staðreynd að íslenskir bankar hafa undanfarna tvo áratugi fjármagnað fasteignalán sín að stærstum hluta með útgáfu sértryggðra skuldabréfa. Einnig má velta fyrir sér hvort ekki sé fullkostnaðarsöm og óskilvirk leið að reka slíkan starfshóp til að ráðherra átti sig á grundvallarstaðreyndum um málaflokka sem heyra undir ráðuneyti hans. Týr er einn af föstum ritstjórnardálkum Viðskiptablaðsins.