Ísraelar réðust í dag á stærsta jarðefnaframleiðslusvæði Írans, að sögn varnarmálaráðherrans Israel Katz. Katz segir að Ísrael muni halda áfram árásum á íranska innviði til að svara árásum gegn ísraelskum borgurum. Verksmiðjurnar eru í Asaluyeh og framleiða um 50% af jarðefnaafurðum landsins. Með fyrri árás í Mahshahr segir Katz að Ísrael hafi nú lamað stöðvar sem standa undir um 85% af útflutningi efnaframleiðslu sem byggi á olíu. Má þar nefna efni í plast og gúmmí. Á sama tíma þrýsta Bandaríkin og milligönguaðilar á um 45 daga vopnahlé sem gæti leitt til varanlegs enda stríðsins. Bandarískir embættismenn segja að líkurnar á árangri séu enn litlar. Olíuverð er stöðugt en mjög hátt. Brent olía stendur í 109 dölum. Hlutabréf á Wall Street hafa hækkað lítilega í dag. Ísrael sagðist einnig hafa drepið njósnastjóra írönsku byltingarvarðarins og yfirmann þeirrar einingar byltingarvarðarins sem embættismenn segja að beri ábyrgð á að skipuleggja árásir gegn Ísraelsmönnum og Bandaríkjamönnum um allan heim. Ísraelar hafa einnig ráðist á þrjá flugvelli í Teheran og eyðilagt herþotur, þyrlur og önnur vígtól Írana. Donald Trump er sagður ætla að halda blaðamannafund klukkan 18 í dag. Trump hótaði að eyðileggja allt raforkukerfi Írans og sagði í viðtali við The Wall Street Journal í gær að Íran „muni ekki hafa nein raforkuver og þeir munu ekki hafa neinar brýr standandi“ ef samkomulag um að opna Hormússundið á ný næst ekki fyrir þriðjudagskvöld.