Verðið á Brent-hráolíu hækkaði veru­lega í morgun og fór hæst í 126,41 dal á tunnu. Það er hæsta verð frá árinu 2022 og hæsta verð frá því átökin í Mið-Austur­löndum hófust. Verðið gaf síðar eftir og var komið í um 121,50 dali á tunnu, sam­kvæmt Financial Times. Hækkunin í dag kom í kjölfar 6,1% hækkunar í gær. Sam­kvæmt FT endur­speglar hækkunin vaxandi ótta á mörkuðum við að truflanir á olíu­flutningum frá Persaflóa geti orðið lang­vinnar. Sér­stak­lega er horft til Hor­mússunds, einnar mikilvægustu flutnings­leiðar heims fyrir olíu. Donald Trump Bandaríkja­for­seti gaf á mið­viku­dag til kynna að Bandaríkin myndu halda áfram að hindra olíu­flutninga um sundið þar til Íran samþykkir sam­komu­lag um að binda enda á kjarn­orkuáætlun sína. Sjá einnig Olíu­verð ekki hærra síðan 2022 Ræddi við olíufélög um áhrifin Olíu­verð tók að hækka eftir að Trump og ráðgjafar hans funduðu með stjórn­endum olíufélaga um áhrif þess ef lokun Hor­mússunds dregst á langinn. Donald Trump Bandaríkjaforseti. © EPA (EPA) Financial Times vísar einnig til frétta Axios um að bandarískir her­foringjar muni kynna for­setanum áætlun um stutta en öfluga árásar­hrinu á Íran. Mark­miðið væri að þrýsta á stjórn­völd í Teheran að hraða friðar­viðræðum. Grein­endur ING segja að olíu­markaðurinn hafi færst frá of mikilli bjartsýni yfir í raun­veru­leikann um fram­boðs­röskun á Persaflóa. Am­rita Sen, stofnandi ráðgjafar­fyrir­tækisins Ener­gy Aspects, segir markaðinn nú farinn að verð­leggja að truflanir geti staðið fram til loka júní. Tækni­legir þættir ýta undir hækkun Hækkunin í olíunni skýrist ekki ein­göngu af óvissu í átökunum milli Írans og Bandaríkjanna en samkvæmt Financial Times er mánaðar­legur loka­dagur fram­virkra samninga með Brent hráolíu í dag. Slík staða getur ýkt verðhreyfingar, þar sem fjár­festar sem eru með skort­stöður þurfa að loka þeim eða standa skil á olíu sam­kvæmt samningum. Það getur aukið eftir­spurn eftir samningum til skamms tíma og þrýst verðinu enn hærra. Engu að síður er megin­skýringin sú að fjár­festar óttast nú að fram­boðs­röskun verði lengri og al­var­legri en áður var talið. Verðbólguótti vaknar á ný Hækkun olíu­verðs hefur þegar haft áhrif á fjár­mála­markaði. Skulda­bréfa­verð lækkaði í Evrópu og Asíu í dag, sem þýðir að ávöxtunar­krafa hækkaði, þar sem fjár­festar óttast að dýrari orka ýti undir verðbólgu á ný. Ávöxtunar­krafa tíu ára þýskra ríkis­skulda­bréfa fór um tíma í 3,13%, sem er hæsta gildi frá árinu 2011. Krafa á tíu ára japönsk ríkis­skulda­bréf fór í 2,52%, sem er hæsta gildi frá árinu 1997. Hluta­bréf lækkuðu einnig víða. Stoxx Europe 600-vísi­talan lækkaði lítil­lega, franska CAC 40 lækkaði um rúmt pró­sent og japanska Topix-vísi­talan féll um 1,2%. Jim Reid, yfir­maður hag­fræði­greiningar Deutsche Bank, segir að þar sem engin merki séu um friðar­viðræður og ótti við stig­mögnun fari vaxandi séu áhyggjur af stöðnun og verðbólgu orðnar ofar­lega í huga markaðsaðila. Sjá einnig Verðbólga á evru­svæðinu hækkar meira en búist var við