Skort­stöður í Al­vot­ech minnkuðu í fyrri hluta marsmánaðar, sam­kvæmt nýjustu gögnum um skortsölu í félaginu. Þann 13. mars námu skort­stöður í hluta­bréfum félagsins 2.457.228 hlutum, saman­borið við 2.961.422 hluti 27. febrúar. Skort­staðan dróst því saman um rúm­lega 504 þúsund hluti, eða um 17 pró­sent, á tveimur vikum í að­draganda upp­gjörs félagsins sem birt var 19. mars. Þróunin bendir til þess að hluti fjár­festa hafi lokað skort­stöðum fyrir birtingu upp­gjörsins. Slík þróun sést gjarnan þegar skort­salar kjósa að draga úr áhættu áður en af­komutölur og nýjar upp­lýsingar um rekstur liggja fyrir. Sam­hliða lækkun skort­staðna jókst meðaldag­leg velta í hluta­bréfum Al­vot­ech. Hún nam 671.041 hlut 13. mars, saman­borið við 690.848 hluta­bréf tveimur vikum fyrr og aðeins 364.961 hluta­bréf um miðjan febrúar. Aukning í veltu skiptir máli í þessu sam­hengi þar sem hún hefur bein áhrif á svo­nefnt days to cover. Það hlut­fall mælir hversu marga við­skipta­daga það tæki skort­sala að kaupa til baka öll þau hluta­bréf sem seld hafa verið skort, miðað við meðal­veltu bréfsins. Því lægra sem hlut­fallið er, þeim mun auðveldara er fyrir fjár­festa að loka stöðum sínum án þess að þurfa að taka stóra markaðsáhættu. Þann 13. mars var days to cover í Al­vot­ech 3,66 dagar, saman­borið við 4,29 daga 27. febrúar. Í lok janúar hafði hlut­fallið hins vegar verið yfir 8 dögum, sem benti þá til þess að erfiðara gæti reynst að loka stöðum hratt án áhrifa á markaðsverð. Þótt skort­stöður hafi minnkað í mars voru þær enn tals­vert yfir stöðunni í lok síðasta árs. Þær námu 2.057.424 hlutum 31. desember og höfðu því hækkað um tæp 400 þúsund hluta­bréf frá áramótum þrátt fyrir lækkunina í mars. Sjá einnig Vendipunktur í vor Gögnin sýna jafn­framt að skort­stöður í Al­vot­ech höfðu sveiflast nokkuð á fyrstu mánuðum ársins. Þær jukust úr 2,29 milljónum hluta um miðjan janúar í 2,44 milljónir í lok mánaðarins, fóru síðan í 2,50 milljónir um miðjan febrúar og náðu tæpum 3 milljónum hluta í lok febrúar áður en þær tóku að ganga til baka í mars. Lækkun skort­staðna sam­hliða meiri veltu í að­draganda upp­gjörs gefur þannig til kynna að ein­hverjir fjár­festar hafi kosið að minnka veðmál sín gegn félaginu áður en markaðurinn fékk nýja mynd af stöðu og horfum Al­vot­ech. Sjá einnig Stamt gólf ekki ástæða synjunar