Ný könnun sem Gallup hefur gert fyrir Viðskiptablaðið sýnir vaxandi andstöðu við aðild Íslands að Evrópusambandinu. Eins og Viðskiptablaðið hefur þegar grein frá þá sýnir könnunin að 47% eru andvíg því að Ísland gangi í Evrópusambandið, 40% eru hlynnt inngöngu og 13% segjast hvorki hlynnt né andvíg. Sjá einnig Meiri­hlutinn and­vígur aðild að Evrópu­sam­bandinu Í könnun, sem Gallup birti í apríl 2025, voru 44% landsmanna hlynntir því að Íslands gangi í Evrópusambandið, 36% voru andvígir og 20% svöruðu hvorki né. Í könnun sem Gallup birti í byrjun febrúar síðastliðinn voru fylkingarnar jafnar. Þá sögðust 42% vera hlynntir inngöngu og 42% sögðust andvíg inngöngu. Í þessari könnun voru 16%, sem svöruðu hvorki né. Margir alfarið andvígir Í könnununum Gallup um aðild að ESB eru gefnir sjö svarmöguleikar, alfarið hlynnt(ur), mjög hlynnt(ur), frekar hlynnt(ur), hvorki né, frekar andvíg(ur), mjög andvíg(ur) og alfarið andvíg(ur). Á vefsíðu Gallup má lesa niðurstöður kannana, sem gerðar hafa verið um afstöðu landsmanna til innöngu í ESB allt aftur til ársins 2010. Á síðustu 16 árum hafa aldrei fleiri sagst alfarið andvígir inngöngu. Í nýjustu könnuninni er þetta hlutfall komið í 28% en hafði áður hæst farið í 26% en það var árið 2010. Lægst hefur þetta hlutfall farið í 13% en það var árið 2022. Að þessu sögðu er alveg ljóst að andstæðingar inngöngu eru komnir með vind í seglin. Sótt var um aðild árið 2009 Ríkisstjórn Samfylkingar og Vinstri grænna, undir forystu Jóhönnu Sigurðardóttur, sótti formlega um aðild að Evrópusambandinu í júlí 2009. Ákvörðunin var tekin í kjölfar bankahrunsins og var strax umdeild enda féllu atkvæði þannig í þinginu að 33 greiddu atkvæði með og 28 á móti. Ríkisstjórn Jóhönnu Sigurðardóttir sótti um aðild að Evrópusambandinu árið 2009. © Haraldur Jónasson (VB MYND/HARI) Evrópusambandið samþykkti svo að hefja aðildarviðræður á árinu 2010. Viðræðurnar voru settar á ís þegar ný ríkisstjórn Sjálfstæðisflokks og Framsóknarflokks tók við völdum árið 2013. Tveimur árum síðar var umsóknin dregin til baka. Á vef stjórnarráðsins segir að þjóðaratkvæðagreiðslan, sem núverandi ríkisstjórn hefur boðað þann 29. ágúst, snúist um að halda “áfram viðræðum um mögulega aðild Íslands að Evrópusambandinu“. Þar kemur jafnframt fram að viðræðum um aðild að Evrópusambandinu sé skipt upp í 35 samningskafla á hinum ýmsu málefnasviðum, þar af 33 efniskafla. Þegar hlé hafi verið gert á aðildarviðræðum Íslands gagnvart Evrópusambandinu síðast hafi 27 samningskaflar verið opnaðir af efnisköflunum 33. Að auki hafi Ísland lagt fram samningsafstöðu í tveimur köflum til viðbótar. Alls hafi viðræðum vegna 11 samningskafla verið lokið. Nánar er fjallað um málið í Viðskiptablaðinu . Áskrifendur geta lesið fréttina í heild hér .