Kristrún Frostadóttir forsætisráðherra sagði á aðalfundi Seðlabankans í dag að hún muni á næstu dögum efna til þríhliða samtals ASÍ, SA og stjórnvalda um leiðir til að hemja verðbólgu á næstu misserum. „Það er ríkur vilji til að tryggja að forsendur kjarasamninga haldi,“ sagði Kristrún og vísaði þar til forsenduákvæði kjarasamninga á almennum vinnumarkaði. Forsenduákvæði í langtíma kjarasamningum gæti virkjast ef verðbólga mælist yfir 4,7% í næstkomandi ágústmælingu Hagstofunnar. Verðbólga mældist 5,4% í mars. Sjá einnig SA ítreka beiðni um þríhliða samráðsvettvang Kristrún sagði á fundi Seðlabankans að hún hafi verið skýr við aðila vinnumarkaðarins að það sé ekki tímabært að setjast við kjarasamningaborð. „Og ég hef gert aðilum vinnumarkaðarins það algjörlega ljóst að þessi ríkisstjórn hafnar þeirri leið — sem áður hefur tíðkast — að stjórnvöld efni til nýrra varanlegra ríkisútgjalda sem eru ófjármögnuð til að höggva á hnúta í kjaradeilum á almennum vinnumarkaði. Allra síst kemur það til greina á tímum sem þessum þegar staða verðbólgu og verðbólguvæntinga er eins viðkvæm og raun ber vitni.“ Segir að aðild að ESB gæti verið akkeri Forsætisráðherra sagði að staðan í efnahagsmálum og horfur til næstu ára séu tvímælalaust öllu betri en þegar svokallaðir þjóðarsáttarsamningar voru gerðir á árinu 1990. „Þó að það sé ekki nýtt að nú sé talað um þörf á þjóðarsátt þá má fagna slíkri umræðu — enda ljóst að breið samstaða um að kveða niður verðbólgu er nauðsynleg til að árangur náist.“ Kristrún sagði forsendu fyrir þjóðarsáttinni á sínum tíma hafa verið kerfisbreyting og að framlag ríkisins hafi helst ekki síst falist í fastgengisstefnu sem var innleidd ári fyrr á árinu 1989. „Það var akkerið sem ríkið lagði á borðið.“ Fastgengisstefnan hafi heppnast vel á tíunda áratugnum m.a. vegna þjóðarsáttasamninganna „en þeir skiluð svo góðum árangri vegna þess að fastgengið var einmitt akkerið sem virkaði til að koma böndum á verðbólgu og verðbólguvæntingar á þeim tímapunkti“. „Stórir sigrar í þessum efnum vinnast ekki með bendingum eða skeytasendingum eða með því að stilla gagnaðilum sínum upp við vegg. Slíkir sigrar geta aðeins unnist með trausti og fórnum. Og með því að taka til umræðu kerfisbreytingar og stórar ákvarðanir — ekki af ótta heldur æsingalaust.“ Hún sagði ríkisstjórnin hafi m.a. þess vegna kallað eftir opinni og málefnalegri umræðu um valkosti Íslands í Evrópumálum og þar með talið í peningamálum. „Ef þjóðin velur að halda áfram viðræðum um aðild að Evrópusambandinu þá gæti það verið akkeri fyrir vinnumarkaðinn og efnahagslífið. Sem útheimti umbætur á íslenska vinnumarkaðsmódelinu. Það væri einn valkostur — sem ég tel rangt að útiloka á þessum tímapunki. En það verður þjóðarinnar að ákveða.“ Önnur kerfisbreyting væri afnám verðtryggingar í skrefum, en ríkisstjórnin hefur boðað aðgerðir til að draga úr vægi hennar í hagkerfinu. Kristrún sagði það ekki vera sjálfgefið að það verði auðvelt verkefni.