Forsætisráðuneytið hefur birt aðgerðaáætlun fyrir árin 2026-2027, sem inniheldur 35 aðgerðir, vegna nýrrar atvinnustefnu stjórnvalda sem lýst er sem 10 ára vaxtarplani fyrir íslenskt hagkerfi. Stefnt er að því að ný aðgerðaáætlun verði kynnt á u.þ.b. tveggja ára fresti, að því er segir í tilkynningu ráðuneytisins. Meðal aðgerða er „markviss móttaka stórfjárfestinga til atvinnuþróunar“. Undir þeim lið segir að ráðist verði í heildstæða greiningu á regluverki, ferlum og skilyrðum sem varða erlendar fjárfestingar með það að markmiði að einfalda ferla, samræma kröfur og innleiða skilvirka, skýra og samræmda stafræna málsmeðferð. „Opnuð verður aðgengileg upplýsingagátt fyrir fjárfesta sem er ætlað að draga úr óvissu, töfum og umsýslukostnaði og styðja við verkefni allt frá hugmyndastigi til framkvæmdar.“ Sjá einnig Ráða Karl sem verk­efna­stjóra stór­fjár­festinga Markmið aðgerðarinnar, sem á að koma til framkvæmda fyrir lok þessa árs, er að liðka fyrir atvinnuþróun og nýfjárfestingum um allt land og að gera Ísland að aðlaðandi og samkeppnishæfum kosti fyrir stórfjárfestingar, að því er segir í aðgerðaáætluninni. Skilgreina hagsmuni í utanríkisviðskiptum Önnur aðgerð, sem verður á forræði utanríkisráðuneytisins, felur í sér að skilgreina hagsmuni Íslands í utanríkisviðskiptum „með hliðsjón af markmiðum stjórnvalda um efnahagslegt öryggi“. „Íslenskt atvinnulíf og velsæld samfélagsins eru háð greiðum aðgangi að erlendum mörkuðum og aðföngum. Við breyttar aðstæður, þar sem viðskipti eru í auknum mæli nýtt sem tæki í milliríkjasamskiptum, er mikilvægt að móta heildstæða sýn á efnahagslegt öryggi og áfallþol samfélagsins. Jafnframt felst önnur aðgerð í því að verja og bæta aðgang íslenskra útflytjenda að mörkuðum erlendis með markvissri hagsmunagæslu og þróun viðskiptasambanda. Áhersla verði á að efla tvíhliða samskipti og ávinning af fríverslunarsamningum. „Á grundvelli samkomulags Íslands og Evrópusambandsins er stefnt að endurskoðun viðskiptakjara milli Íslands og ESB. Gætt verður að viðskiptahagsmunum gagnvart Bandaríkjunum og sótt fram á vaxandi mörkuðum, svo sem á Indlandi og í Mercosurríkjunum í Suður-Ameríku. Jafnframt verða viðskiptatengsl við Grænland og Færeyjar efld m.a. með gerð viðskiptasamnings við Grænland.“ Boða breytt regluverk um gagnaver Meðal háframleiðnigreina sem stjórnvöld horfa til í tengslum við atvinnustefnuna eru gagnaver. Stefnt er að því að greina og móta regluverk sem á að stuðla að skýrara rekstrarumhverfi gagnavera hér á landi. Nokkur álitaefni bíði úrlausnar, svo sem varðandi skattskil gagnavera og skattalega meðferð starfseminnar. Sjá einnig Ekki víst að gagna­vera­iðnaðurinn haldi áfram að vaxa Forstjóri atNorth, sem rekur þrjú gagnaver á Íslandi, lýsti í nýlegu viðtali við Viðskiptablaðið að það sé letjandi fyrir erlenda aðila að reisa gagnaver eða eiga í viðskiptum við gagnaver á Íslandi að þurfa að greiða virðisaukaskatt af tölvubúnaði strax þegar hann er fluttur til landsins og treysta á að hann verði endurgreiddur. „Þegar verið er að flytja inn búnað fyrir tugi eða hundruð milljarða liggur í augum uppi að það er verulega íþyngjandi fyrir erlenda viðskiptavini gagnavera að þurfa að borga 24% virðisaukaskatt af verðmæti hans,“ sagði Eyjólfur Magnús Kristinsson, forstjóri atNorth. Endurskoðun fasteignaskatts fyrir landeldi Ein aðgerð snýr að því að bæta samkeppnishæfni og fyrirsjáanleika rekstrarumhverfis landeldis „með sanngjarnari og samræmdri álagningu fasteignaskatts og tryggja jafnræði við aðrar atvinnugreinar“. Farið verður yfir núverandi lagaumgjörð og hvernig flokkun fiskeldis samræmist flokkun annarra atvinnugreina, svo sem landbúnaði, þegar kemur að álagningu fasteignaskatts. Setja 1,1 milljarð í gervigreindarinnviði Ríkið hyggst verja 1,1 milljarði króna á næstu tveimur árum í uppbyggingu gervigreindarinnviða sem eiga að stuðla að aukinni framleiðni, verðmætasköpun og gæðum í opinberri þjónustu. „Verkefnið felur m.a. í sér fjárfestingu í reikniinnviðum og vélbúnaði í samstarfi hins opinbera og einkaaðila, með áherslu á gagnaöryggi, menningarlega sérstöðu og gervigreindarfullveldi sem tryggir örugg yfirráð yfir tæknilausnum og mikilvægum gögnum.“ Þá verði vinna hafin við þróun og rekstur íslensks mállíkans í samstarfi við alþjóðleg tæknifyrirtæki, með það að markmiði að styrkja stafræna notkun íslenskrar tungu, efla stafrænt þjóðaröryggi og bæta samkeppnisstöðu atvinnulífsins. Endurskoða regluverk nýsköpunarfyrirtækja Stefnt er að því að einfalda og styrkja laga- og skattalega umgjörð nýsköpunarfyrirtækja. Í plagginu segir að regluverk verði endurskoðað, m.a. um kauprétti, hlutdeild erlendra sérfræðinga og stjórnarmanna, skattskyldu hagnaðar erlendra aðila og VSK-skráningu sprotafyrirtækja. Jafnframt verði innkaupareglur ríkisins endurskoðaðar til að greiða leið fyrir nýskapandi hugmyndir og lausnir á markaði. Stefna að einföldun regluverks Nokkrar tillögur lúta að einföldun regluverks, m.a. þegar kemur að atvinnulífinu. Þannig kemur fram að fara eigi kerfisbundið yfir íslenskt regluverk. Gæðaeftirlit vegna nýrrar löggjafar og reglusetningar verði bætt, þ.m.t. verður hugað að hlutverki ráðgjafarnefndar um opinberar eftirlitsreglur. „Þess verður gætt við upptöku og innleiðingu nýrra EES-reglna að þar sé ekki gengið lengra í íþyngjandi kröfum á atvinnulífið en nauðsyn krefur. Einföldun reglna sem nú er í undirbúningi innan Evrópusambandsins verður sett í forgang þegar kemur að upptöku í EES-samninginn og innleiðingu hér á landi.“