Umhverfis-, orku- og loftslagsráðherra hefur boðað frumvarp sem felur í sér flýtingu uppbyggingar innviða og einföldun regluverks þegar kemur að flutnings- og dreifikerfis raforku. Til stendur meðal annars að tryggja að ágreiningur um bótafjárhæð eða lögmæti eignarnáms verði ekki sjálfkrafa til þess að fresta nauðsynlegum framkvæmdum, að því gefnu að réttindi landeigenda séu tryggð með fullnægjandi hætti. Mesta andstaðan við áform ráðherra kemur frá landeigendum þar sem Holtavörðuheiðarlínur 1 og 3 eiga að rísa. Í umsögnum þeirra kemur fram að frumvarpið gangi of langt í því að skerða eignarrétt og að samráð hafi verið ófullnægjandi. Verið sé að veita ríkinu, fyrirtækjum þess og stofnunum of mikið vald og skapa hættulegt fordæmi fyrir framtíðina. Hagsmunasamtök landeigenda vegna Holtavörðuheiðarlínu 3 gagnrýna einnig að heimildir séu samræmdar fjarskiptalögum þar sem raforkumannvirki séu umfangsmeiri og hafi meiri umhverfisáhrif. Reynslan erlendis frá að sýni að þegar stjórnvöld reyna að hraða innviðauppbyggingu með því að draga úr réttaröryggi og aðkomu landeigenda og sveitarfélaga leiði það nær undantekningarlaust til aukins ágreinings, kærumála og langvarandi tafa. Samtökin segja samskipti við Landsnet hafa verið góð og telja lagasetningu óþarfa. Hagsmunasamtök landeigenda vegna Holtavörðuheiðarlínu 1 eru enn andvígari og segja stjórnvöld þegar hafa grafið undan réttindum þeirra, meðal annars með skipun raflínunefndar í nóvember síðastliðnum. Að þeirra mati eru framkvæmdirnar fyrst og fremst í þágu fjárfesta og stórnotenda, ekki almennings. Þá saka landeigendurnir Landsnet um leyndarhyggju og takmarkaða upplýsingagjöf. Um er að ræða mikilvægar framkvæmdir en Holtavörðuheiðarlínur 1 og 3 eru hluti af nýrri byggðarlínu sem er ætlað að tengja saman alla landshluta. Að sögn Rögnu Árnadóttur, forstjóra Landsnets, er ljóst að allt stefni í að þær framkvæmdir muni reynast umdeildar og nauðsynlegt að finna út úr því hvernig leysa eigi þau deilumál. Þegar kemur að gagnrýni landeigenda í garð Landsnets hafi þau fullan hug á að bæta úr því og bæta samskiptin. „Auðvitað viljum við eiga sem mest samskipti við landeigendur og finna út úr því hvort það sé hægt að finna aðrar útfærslur og fara aðra leið um landið. Út á það meðal annars ganga þessi samskipti,“ segir Ragna. Önnur lína, Blöndulína 3, hefur sömuleiðis lengi verið í undirbúningi, eða allt frá árinu 2008. Nú er beðið er eftir að sveitarfélögin gangi frá skipulagsmálum. „Við erum að fara að vinda okkur í að ljúka síðasta hluta samningaviðræðna og finna út úr því hvernig eigi að leysa úr deilumálum þar. Blöndulína 3 er búin að vera lengi í bígerð og það er kominn tími á að fara að klára það mál svo hægt sé að hefja undirbúning framkvæmda.“ Nánar er fjallað um málið í Viðskiptablaðinu . Áskrifendur geta lesið fréttina í heild hér .