Umhverfis-, orku- og loftslagsráðherra hefur boðað frumvarp sem felur í sér flýtingu uppbyggingar innviða og einföldun regluverks þegar kemur að flutnings- og dreifikerfis raforku. Til stendur meðal annars að tryggja að ágreiningur um bótafjárhæð eða lögmæti eignarnáms verði ekki sjálfkrafa til þess að fresta nauðsynlegum framkvæmdum, að því gefnu að réttindi landeigenda séu tryggð með fullnægjandi hætti. Tilefni frumvarpsins er að uppbygging flutnings- og dreifikerfis raforku hefur tafist verulega á undanförnum árum, oft vegna ágreinings um eignarnám, umráðatöku og fjárhæð eignarnámsbóta. Þá hafa flókin leyfisferli átt þátt í því hve hægt hefur gengið að koma nauðsynlegum innviðaframkvæmdum af stað. Nýlegt dæmi um framkvæmdir sem hafa tafist verulega vegna deilumála er Suðurnesjalína 2, sem hefur verið í bígerð í hátt í tvo áratugi. Sem stendur eru tvö dómsmál í gangi í tengslum við línuna sem Hæstiréttur hefur tekið fyrir. Annars vegar er um að ræða dómsmál vegna eignarnáms á þremur jörðum. Landsnet og íslenska voru sýknuð í héraði og Landsrétti, en vonir eru bundnar við að niðurstöður Hæstaréttar liggi fyrir í vor. Hins vegar kærðu landeigendur Landsnet og sveitarfélagið Voga vegna framkvæmdaleyfis sem sveitarfélagið veitti. Landsnet og Vogar voru sýknuð í héraði, en Hæstiréttur hefur ekki sett málið á dagskrá. „Það tefjast þarna mikilvægar framkvæmdir sem varða orkuöryggi á Suðurnesjum og orkunotkun. Þannig það er mjög bagalegt að deilumálin skuli taka svona langan tíma, það hlýtur að vera hægt að finna leið til að skera úr um þessi mál á skemmri tíma,“ segir Ragna Árnadóttir, forstjóri Landsnets. Telja má líklegt að hægt hefði verið að spennusetja Suðurnesjalínu 2 fyrr með breytingunum sem ráðherra boðar. Nánar er fjallað um málið í Viðskiptablaðinu . Áskrifendur geta lesið fréttina í heild hér .