Samfylkingin kynnti í dag stefnu fyrir komandi sveitarstjórnarkosningar. Yfirskriftin er „Tökum ábyrgð hvert á öðru“ og í stefnunni eru lögð fram þrjú samvinnuverkefni ríkis og sveitarfélaga. Það eru aðgerðir til að lækka kostnað barnafólks, áframhaldandi þjóðarátak í umönnun eldra fólks og stuðla að frekari uppbyggingu á hjúkrunarrýmum. Þá snúa tillögurnar einnig að einföldun leyfisveitinga og regluverks. Það var Kristrún Frostadóttir formaður Samfylkingarinnar sem kynnti stefnuna á útifundi á Smáratorgi. Vilja lögfesta leikskólavist eftir fæðingarorlof Tillögur Samfylkingarinnar að leikskólamálum fela í sér þak á leikskólagjöld og 100% systkinaafslátt. Þá er lagt til að réttur til leikskólavistar verði lögfestur frá því að fæðingarorlofi lýkur. „Það er auðvitað þannig að á öllum Norðurlöndunum hefur þetta verið gert,“ segir Kristrún sem leggur áherslu á að leikskólamálin séu sameiginlegt verkefni ríkis og sveitarfélaga. Samfylkingin kynnti í dag nýtt útspil fyrir komandi sveitarstjórnarkosningar í maí. Það felur meðal annars í sér þak á leikskólagjöld, boðun áframhaldandi þjóðarátaks í umönnun aldraðs fólks og einföldun á leyfisveitingum og regluverki. „Þetta er ekki lögbundið verkefni í dag hjá sveitarfélögum. Þau hafa öll lagt áherslu á leikskólavist en það þýðir til að mynda að þetta er ekki fjármagnað í gegnum ríkið og það er ekki trygging, ef svo má segja, það er ekki réttur sem liggur fyrir eins og með grunnskólann,“ segir Kristrún. Þetta þurfi að gera í skrefum næstu fjögur árin segir Kristrún og geti þýtt að ríkið þurfi að setja aukna fjármuni í málaflokkinn til sveitarfélaga. „Með tíð og tíma væri þá hægt að skapa aukna samvinnu milli þessara tveggja stjórnsýslustiga,“ segir hún. Hafna Kópavogsmódelinu Með þessu sé Samfylkingin að hafna Kópavogsmódelinu. „Fyrst við erum hér í Kópavogi í dag þá finnst mér rétt að nefna að það er hægt að gera breytingar án þess að ganga jafn langt og hefur verið gengið,“ segir hún. „Þess vegna erum við að tala um þak á leikskólagjöld, 50 þúsund krónur á mánuði, að engin fjölskylda greiði meira í heild sinni,“ segir Kristrún. „Þannig hlífum við fólki við þessum 450 þúsund króna barnaskatti eins og við köllum hann hér í Kópavogi,“ segir Kristrún sem miðað þá við að fjölskylda með tvo börn í leikskóla í 40 tíma í Kópavogi greiði 450 þúsund krónum meira en í Reykjavík. Aðspurð um kostnað og hvernig tillögurnar verði framkvæmdar segir hún að málið yrði sett í forgang. „Reykjavík hefur tekist að gera sínar breytingar á leikskólamódelinu, til að bregðast við athugasemdum og til að bregðast við lokunum,“ segir hún. „Í einhverjum tilvikum hefur þurft að hækka hluta af gjaldskrá, við getum sýnt því skilning, en það þarf ekki að ganga svona langt.“ Umönnun eldra fólks og einföldun regluverks Stefnan sem Samfylkingin kynnti snýr einnig að umönnun eldra fólks. Lagt er til að þjónusta við eldra fólk verði efld með samþættingu heimaþjónustu, heimahjúkrunar og öldrunarráðgjafa. Markmiðið sé að helminga biðlista eftir hjúkrunarrýmum og að árið 2030 sé miðað við að biðlistinn verði kominn niður í 100 manns en að sá hópur fái biðrými og enginn bíði lengur en 90 daga. Tillögurnar snúa einnig að auðveldun reksturs með einföldun á leyfisveitingum og regluverki. Dregið verði úr kvöðum við að afla umsagna og tímamörk sett á afgreiðslu leyfisveitinga. Samfylkingin leggur einnig til að komið verði upp einum viðkomustað fyrir fyrirtæki hjá hverju sveitarfélagi, þar sem fyrirtæki hafi fastan tengipunkt.