Ríkisút­varpið tók til sín nærri 29% af öllum fjölmiðla­tekjum á Ís­landi á árinu 2024, sam­kvæmt nýjum tölum Hag­stofu Ís­lands. Af heildar­tekjum fjölmiðla, sem námu 30,3 milljörðum króna, runnu tæpir 8,7 milljarðar til RÚV. Hlut­deildin jókst um tvö pró­sentu­stig milli ára, úr 27% í 29%, sem þýðir að nærri þrjár af hverjum tíu krónum sem runnu til fjölmiðla í landinu enduðu hjá ríkismiðlinum. Með um 41% af tekjum á útvarps- og sjónvarpsmarkaði Þessi staða dregur skýrt fram sterka stöðu RÚV og ríkisins á ís­lenskum fjölmiðla­markaði á sama tíma og heildar­tekjur greinarinnar drógust saman. Fjölmiðla­tekjur lækkuðu um 3% milli ára á föstu verðlagi og námu alls 30,3 milljörðum króna. Þar af voru not­enda­tekjur tæpir 18,7 milljarðar króna og aug­lýsinga­tekjur 11,6 milljarðar. Sam­dráttinn rekur Hag­stofan meðal annars til 4% minnkandi not­enda­tekna og 2% sam­dráttar í aug­lýsinga­tekjum. Þegar nánar er rýnt í stöðu RÚV kemur fram að félagið styrkti stöðu sína sér­stak­lega á út­varps­markaði í víðum skilningi, það er í hljóð­varpi og sjón­varpi saman­lagt. Tekju­hlut­deild RÚV þar jókst í 41% árið 2024. Aukningin kom öll fram í sjón­varpi, þar sem hlutur RÚV fór úr 32% í 34%, en í hljóð­varpi stóð hlut­deildin í stað í 64%. Sé horft til lengri tíma hefur vægi RÚV á fjölmiðla­markaði aukist enn frekar. Árið 2010 var hlut­deild félagsins í heildar­tekjum fjölmiðla 24%, en var komin í 29% árið 2024. Hag­stofan segir aukninguna fremur skýrast af vaxandi not­enda­tekjum en aug­lýsingum. Hlut­fall RÚV í not­enda­tekjum fjölmiðla hækkaði þannig úr 28% í 33% á tíma­bilinu, en hlut­deild þess í aug­lýsinga­tekjum fór úr 19% í 22%. Tölurnar sýna jafn­framt mjög samþjappaðan fjölmiðla­markað. Sam­kvæmt Hag­stofunni runnu 88% allra fjölmiðla­tekna árið 2024 til fimm rekstraraðila, að RÚV meðtöldu. Þegar aðeins er horft til einka­rekinna miðla runnu 85% saman­lagðra tekna til fimm stærstu aðilanna. Breytingar á fjölmiðla­neyslu endur­speglast einnig í tekju­skiptingunni. Sjón­varp tók til sín 55% allra fjölmiðla­tekna á síðasta ári og hljóð­varp 15%, á meðan dag- og viku­blöð og vef­miðlar voru hvort um sig með 12% hlut­deild. Hlutur tekna frá not­endum hefur vaxið á undan­förnum árum, en hlutur aug­lýsinga dregist saman.