Fjár­mögnun Norræna fjár­festingar­bankans til fram­kvæmda við Hellis­heiðar­virkjun á að styrkja af­hendingaröryggi heits vatns á höfuð­borgar­svæðinu á sama tíma og íbúum heldur áfram að fjölga. Þetta er megin­inn­tak nýrrar til­kynningar vegna 4,6 milljarða króna láns sem Orku­veita Reykja­víkur hefur samið um við bankann. Lánið, sem nemur 32 milljónum evra, er veitt til tíu ára og á að fjár­magna fram­kvæmdir ON Power við Hellis­heiðar­virkjun á árunum 2025 til 2027. Heildar­kostnaður verk­efnisins er áætlaður 6,3 milljarðar króna. Megin­áherslan í verk­efninu er að auka varma­fram­leiðslu til hús­hitunar, bora nýja vinnslu­holu og reisa nýtt viðhalds- og geymslu­húsnæði. Með fram­kvæmdunum á varma­fram­leiðslu­geta virkjunarinnar að aukast úr 220 mega­vöttum í 345 mega­vött. Sam­kvæmt til­kynningunni er gert ráð fyrir að aukin geta skili að jafnaði 50 þúsund til 100 þúsund mega­vatt­stundum af endur­nýjan­legum varma á álagstímum í upp­hafi. Nýtingin eigi síðan eftir að aukast sam­hliða áfram­haldandi upp­byggingu byggðar á höfuð­borgar­svæðinu. Þá er jafn­framt áætlað að ný vinnslu­hola bæti við 5 mega­vöttum í raf­orku­fram­leiðslu. Í til­kynningunni er sér­stak­lega bent á að íbúum Reykja­víkur hafi fjölgað jafnt og þétt á síðasta ára­tug og að áfram sé gert ráð fyrir fólks­fjölgun á næstu árum. Fjár­festingin er því sett fram sem hluti af viðbragði við vaxandi eftir­spurn eftir heitu vatni. „Þessi fjár­festing er mikilvægt skref til að styrkja þol og getu jarðhita­kerfa til að mæta vaxandi eftir­spurn á höfuð­borgar­svæðinu. Þar sem þörf fyrir heitt vatn og raf­orku eykst ár frá ári er nauð­syn­legt að fjár­festa í sjálf­bærum og framtíðarþolnum inn­viðum. Með því að auka fram­leiðslu­getu Hellis­heiðar­virkjunar tryggjum við örugga, skil­virka og áreiðan­lega orku­fram­leiðslu til sam­félagsins og nýtum jafn­framt verðmætar, hreinar jarðhita­auðlindir Ís­lands á ábyrgan hátt,“ segir Sævar Freyr Þráins­son, for­stjóri Orku­veitu Reykja­víkur. Sjá einnig Orku­veitan fær 4,6 milljarða lán frá NIB „Há­marks­þörf fyrir heitt vatn í Reykja­vík eykst ár­lega um 120 lítra á sekúndu. Það er okkur sönn ánægja að styðja við Orku­veitu Reykja­víkur, sem hefur verið við­skipta­vinur NIB lengi, þar sem fyrir­tækið heldur áfram að efla af­hendingaröryggi með fjár­festingum í jarðhita­inn­viðum til að mæta vaxandi eftir­spurn,“ segir André Küüsvek, stjórnar­for­maður og for­stjóri NIB.