Þrettán ára drengur var handtekinn í Lundúnum í dag grunaður um að hafa ráðist á samnemendur sína með hnífi. Tveir drengir, tólf og þrettán ára, eru þungt haldnir á sjúkrahúsi, að sögn bresku lögreglunnar. Árásin varð í Kingsbury-skólanum um hádegisbilið í dag. Drengurinn var handtekinn nokkrum klukkustundum eftir að hann yfirgaf skólann. Tildrög árásarinnar eru ókunn. Hryðjuverkadeild lögreglunnar leiðir rannsóknina en árásin hefur ekki verið skilgreind sem hryðjuverk.