Gengi hlutabréfa er staðhæfing um framtíðarþróun. Það er kannski ekki augljóst en gengið endurspeglar forsendur um tekjuþróun, hagnað og áhættu. Að læra að lesa þessar forsendur er mikilvæg færni sem fjárfestar geta tileinkað sér. Gengi hlutabréfa er í raun leið hlutabréfamarkaðarins til að segja: „Miðað við vænt sjóðstreymi í framtíðinni og þá áhættu sem því fylgir, er þetta virði fyrirtækisins í dag.“ Gengið felur þannig í sér spá markaðarins um framtíðina, hlutaverk fjárfesta er að túlka hana. Hugsum okkur fyrirtæki sem er metið á 8 sinnum hagnað. Markaðurinn er þá líklega að gera ráð fyrir litlum vexti, aukinni áhættu eða minnkandi arðsemi bundins fjármagns. Fyrirtæki sem er hins vegar metið á 25 sinnum hagnað gefur til kynna meiri vöxt, sterkari samkeppnisstöðu eða lægri áhættu. Hvorugt verðmat er í sjálfu sér rétt eða rangt. En hvort tveggja endurspeglar tilteknar væntingar um framtíðina. Kjarni málsins er sá að hægt er að véfengja þessar væntingar. Ef hlutabréf er verðlagt út frá 2% árlegum vexti en fjárfestir telur að fyrirtækið geti vaxið um 8%, gæti það verið tækifæri. Ef hlutabréf er metið eins og allt muni ganga upp en fjárfestir sér áhættu sem markaðurinn vanmetur gæti það einnig verið tækifæri. Sumir fjárfestar þurfa að temja sér þessa hugsun. Í stað þess að spyrja sig „er þetta hlutabréf dýrt eða ódýrt?“ gætu þeir spurt sig „hvaða forsendur eru fólgnar í núverandi gengi og er ég sammála þeim?“. Fyrri spurningin byggir á innsæi en sú seinni krefst greiningar og aga. Gengi hlutabréfa er ekki dómur. Það er tilgáta um framtíðina, sett fram í tölum. Markaðir segja ekki hvað er rétt, þeir segja hvers er vænst. Að greina þar á milli er þar sem tækifærin leynast.