Icelandair tapaði 45,3 milljónum dala á fyrsta ársfjórðungi 2026, eða sem nemur 5,6 milljörðum króna. Til samanburðar tapaði flugfélagið 44 milljónum dala á sama tímabili í fyrra. Félagið birti árshlutauppgjör fyrir fyrsta ársfjórðung eftir lokun Kauphallarinnar í dag. Fyrsti ársfjórðungur er gjarnan sá þyngsti í rekstri flugfélagsins. Rekstrarafkoma (EBIT) batnaði hins vegar um 8,9 milljónir dala eða um 1,1 milljarð króna og nam 53,3 milljónum dala eða um 6,6 milljörðum króna. EBIT-hlutfall á fyrsta fjórðungi var neikvætt um 15,4% samanborið við 21,7% á fyrsta fjórðungi 2025. Icelandair segir að snörp hækkun olíuverðs að undanförnu ekki hafa haft teljandi áhrif á afkomuna í fjórðungnum. Hins vegar muni áhrif þeirra koma fram frá og með öðrum ársfjórðungi. „Til að bregðast við þessari stöðu höfum við dregið flugframboð saman um rúmlega 2% frá miðjum apríl til loka júní. Þá eru hækkanir á farmiðaverði óhjákvæmilegar og fargjöld hafa verið hækkuð frá því að þessi þróun eldsneytisverðs hófst. Þetta hefur þó ekki haft mælanleg áhrif á eftirspurn eins og staðan er í dag,“ segir Bogi Nils Bogason , forstjóri Icelandair. Met tekjur á fyrsta fjórðungi Tekjur Icelandair á fjórðungnum námu 346,5 milljónum dala, eða um 42,9 milljörðum króna, sem samsvarar 21% aukningu. Í afkomutilkynningu Icelandair er bent á að hærri tekjur á hvern seldan sætiskílómetra og metsætanýting skiluðu 7% hækkun á einingatekjum. „Bætt skilvirkni skilaði óbreyttum einingakostnaði milli ára, þrátt fyrir umtalsverðar launahækkanir og óhagstæða gengisþróun.“ Bogi segir að met tekjur flugfélagsins á fyrsta ársfjórðungi endurspegli áherslur félagsins á markaðina til og frá Íslandi sem skili betri framlegð við núverandi markaðsaðstæður en tengiflug yfir hafið. „Við jukum flugframboð um 13% sem er í takt við stefnu okkar að nýta innviðina okkar betur. Þrátt fyrir þessa aukningu náðum við met sætanýtingu í fjórðungnum og vorum jafnframt eitt stundvísasta flugfélag í Evrópu þó svo talsverðar raskanir hafi orðið á flugáætlun vegna veðurs á Íslandi í marsmánuði.“ Hann segir tekjur af fraktstarfsemi einnig hafa aukist milli ára og afkoma af leiguflugi hafi verið góð í fjórðungnum. Gengisáhrif og launahækkanir hafi haft neikvæð áhrif á kostnaðarþróun en félagið hélt áfram að leggja áherslu á stundvísi og hagræðingu í rekstri. „Ýmsar ytri aðstæður hafa áhrif á flugrekstur og því er mikilvægt að tryggja fyrirsjáanleika til lengri tíma í sem flestum rekstrarþáttum, svo sem kjarasamningum sem eru nú lausir. Áherslurnar í samningaviðræðum við flugstéttirnar eru að félagið geti áfram boðið eftirsótt störf í flugrekstri á Íslandi með því að tryggja samkeppnishæfni félagsins, styðja við vöxt leiðakerfisins og flotans, ásamt því að auka rekstrarlegan sveigjanleika. Auk þess á félagið í samtali við íslensk stjórnvöld um mikilvægi þess að verja samkeppnishæfni Íslands þegar kemur að evrópsku regluverki, sérstaklega er varðar ETS kerfið og önnur loftslagsgjöld.“ Lausafjárstaða Icelandair hækkaði um 107 milljónir dala miðað við sama tíma í fyrra og nam 616,3 milljónum dala í lok mars sl. eða sem nemur 77 milljörðum króna.