Samtök fyrir­tækja í fjár­málaþjónustu, SFF, leggjast al­farið gegn áformum stjórn­valda um nýjar eða auknar álögur á fjár­mála­geirann. Þetta kemur fram í um­sögn sam­takanna við til­lögu til þingsá­lyktunar um fjár­málaáætlun fyrir árin 2027 til 2031. Í greinar­gerð með fjár­málaáætluninni kemur fram að ein að­gerða til að styrkja tekju­grunn ríkis­sjóðs felist í því að afla viðbótar­skatt­tekna frá fyrir­tækjum í fjár­mála­geiranum. SFF segja áformin koma veru­lega á óvart. Fjár­mála­fyrir­tæki greiði nú þegar þrjá sértæka skatta, lúti hærri eigin­fjárkröfum og kröfum um hærri óvaxta­berandi bindi­skyldu en gengur og gerist í nágrannaríkjum Ís­lands. Nær væri að vinda ofan af núverandi álögum en að bæta við þau, að mati sam­takanna. SFF gagn­rýna jafn­framt að engin samtöl hafi átt sér stað við samtökin um áformin áður en þau voru sett fram í greinar­gerð fjár­málaáætlunar. Samtökin segja „veru­lega óheppi­legt“ að upp­lýsingar um auknar álögur séu settar fram með þessum hætti, án fyrir­vara og án samráðs við hags­muna­samtök eða hagaðila þeirrar at­vinnu­greinar sem um ræðir. Þau segja al­gjöra óvissu ríkja um hvers konar skatta sé að ræða, hvernig þeir verði út­færðir og hvort álagningin verði tíma­bundin eða varan­leg. „Ófyrirsjáanleiki og óvissa af þessu tagi geta haft verulega slæm áhrif á fjármálamarkað, sérstaklega í tilviki smærri hagkerfa, líkt og þess íslenska,“ segir í um­sögn SFF. Sex milljarða skrif Samfylkingar Í um­sögninni er vísað til þess að fram hafi komið á vef þing­flokks Sam­fylkingarinnar og í fjölmiðlum að hækka eigi skatta á banka á ný og að það eigi að skila ríkis­sjóði um sex milljörðum króna í nýjar ár­legar tekjur. SFF segja um „gífur­legar fjár­hæðir“ að ræða og benda á að fjár­hæðin hafi ekki verið form­lega dregin til baka. Þá hafi fjár­mála- og efna­hags­ráðu­neytið, sam­kvæmt um­sögninni, hvorki viljað stað­festa né hafna þeirri fjár­hæð sem nefnd hafi verið í um­ræðunni. Samtökin segja slíka pólitíska óvissu og mögu­legar auknar álögur sem hlaupa á milljörðum geta haft af­leiðingar, meðal annars fyrir fjár­mögnun fjár­mála­fyrir­tækja og við­skipti er­lendra aðila við Ís­land. Greiddu 21 milljarð í sértæka skatta og gjöld SFF benda á að við­skipta­bankarnir fjórir og vá­tryggingafélögin fjögur hafi greitt sam­tals um 21 milljarð króna í sértæka skatta og gjöld árið 2025. Til viðbótar hafi bankarnir greitt meira en 30 milljarða króna í hefðbundinn tekju­skatt. Samtökin segja að á síðustu fimm árum hafi sértækir skattar og gjöld á fjár­mála­kerfið numið 102 milljörðum króna að núvirði, eða 88 milljörðum króna á verðlagi hvers árs. Það séu greiðslur um­fram tekju­skatt. Frá árinu 2021 hafi tekjur ríkis­sjóðs og sveitarfélaga af bönkum og tryggingafélögum numið um 710 milljörðum króna að núvirði, sam­kvæmt um­sögninni. Þar af sé ríf­lega helmingur vegna eignar­halds og tæp­lega helmingur vegna skatt­tekna. Almenningur er stærsti eig­andinn SFF leggja áherslu á að al­menningur sé stærsti eig­andi bankanna, bæði beint og óbeint. Í um­sögninni segir að um 11% banka­kerfisins séu í beinni eigu ein­stak­linga, um 29% í óbeinni eigu al­mennings í gegnum líf­eyris­sjóði og 39% í beinni eigu ríkis­sjóðs vegna Lands­bankans. Sam­tals sé því ­um 78% banka­kerfisins í beinni eða óbeinni eigu al­mennings, fyrir utan eignar­hluti í gegnum verðbréfa­sjóði. SFF segja al­menning því að um­tals­verðu leyti munu sitja uppi með aukna skatt­byrði sem eig­endur bankanna. Samtökin telja tíma­setningu boðaðra skatta­hækkana jafn­framt vafa­sama, þar sem aðeins sé um ár liðið frá sölu ríkis­sjóðs á hlutum í Ís­lands­banka. Frekari skatt­lagning á banka muni fyrir­sjáan­lega rýra verðmæti hluta í ís­lenskum bönkum, þar á meðal verðmæti hluta ríkisins í Lands­bankanum og hluta sem ríkið seldi í Ís­lands­banka. Segja arð­semi ekki um­fram Norður­lönd SFF hafna því að af­koma ís­lenskra banka rétt­læti aukna skatt­lagningu. Þótt af­koma bankanna sé há í krónum talið þurfi að horfa til þess eigin fjár sem þeim sé gert að halda sam­kvæmt lögum og kröfum eftir­lits­stjórn­valda. Í um­sögninni segir að saman­burður við arð­semi eigin fjár annarra at­vinnu­greina hér á landi og banka á Norður­löndum bendi ekki til þess að arð­semi ís­lenskra banka sé um­fram það sem gerist á Norður­löndum. Samtökin segja arð­semi ís­lenskra banka hafa verið tölu­vert lægri en á hinum Norður­löndunum, hvort sem litið sé til síðasta árs, síðustu fimm ára eða síðustu tíu ára. Þá hafi meðalarð­semi eigin fjár stærstu við­skipta­bankanna verið 10,1% árin 2020 til 2024, sem hafi verið lægra en í átta af tíu stærstu at­vinnu­greinum landsins. Kalla eftir samráði SFF segja hug­myndina um auknar álögur „afar illa ígrundaða“ og kalla eftir því að stjórn­völd greini heildaráhrif slíkra að­gerða áður en ákvörðun verði tekin. Samtökin vilja fá tækifæri til að koma fyrir fjár­laga­nefnd og gera grein fyrir sjónar­miðum sínum. Þá óska þau eftir sam­tali og samráði við fjár­mála- og efna­hags­ráðu­neytið áður en ákvörðun verði tekin um hvort raun­veru­lega eigi að skatt­leggja fjár­mála­geirann um­fram það sem gert er í dag. „Skatta­stefna stjórn­valda þarf að vera hóf­stillt, fyrir­sjáan­leg og má ekki raska sam­keppnis­hæfni Ís­lands. Horfa þarf til þess að stefna stjórn­valda í skatta­málum styðji við at­vinnu­sköpun, fjár­festingu, laði að er­lenda fjár­festa og búi yfir stöðug­leika til lengri tíma, en grafi ekki undan þeim hvötum sem bæta líf­skjör,“ segir í um­sögninni.