Fjármálaeftirlit Danmerkur hefur vísað meintum brotum Nordea Finans Danmark á peningaþvættislöggjöf til lögreglunnar. „Það er mat Fjármálaeftirlits Danmerkur að í tilfelli stórs hóps viðskiptavina hafi fyrirtækið ekki nægjanlega þekkingu á viðskiptavinum sínum,“ segir í tilkynningu á vef eftirlitsins. Þar er vísað til rannsóknar sem hófst árið 2023. Nordea Finans Danmark, dótturfélag Nordea bankasamstæðunnar, gagnrýnir ákvörðun fjármálaeftirlitsins um að vísa málinu til lögreglunnar og segir að ákvörðunin sé óhófleg. Forstjóri Nordea Finans Danmark segir í tilkynningu að fyrirtækið virði niðurstöður rannsóknar eftirlitsins og að ráðist hafi verið í úrbætur á kerfum bankans. Það sé hins vegar stór munur á einhverju sem sé ábótavant og því sem sé refsivert. Fjármálaeftirlitið segir að fyrir stóran hóp kreditkortahafa frá Nordea hafi bankinn ekki framkvæmt nægjanlega ítarlegar áreiðanleikakannanir. Þannig hafi bankinn ekki haft nægar upplýsingar um hvers vegna viðskiptavinir þurfa á kreditkorti að halda og í hvaða tilgangi þeir notuðu kortin. Eftirlitið segist telja að um kerfisbundinn galla í viðskiptakerfi Nordea sé að ræða sem hafi leitt til þess að bankinn hafi ekki nægar upplýsingar um tilgang og fyrirhugað eðli viðskiptasambandsins. Því til viðbótar hafi bankinn ekki framkvæmt áhættumat, þar á meðal áhættuflokkun, fyrir stóran hóp viðskiptavina. Tore Falkenberg, forstjóri Nordea Finans Danmark, heldur því fram að bankinn hafi þekkt viðskiptavini sína nægjanlega vel. Þeir hafi áhættumetið viðskiptavini sína og flokkað þá viðskiptavini sem teljast áhættumeiri í þeim tilfellum sem þess var þörf.