Landsbankinn segir samanlögð áhrif sértækra skatta á banka hér á andi og vaxtaleysi á bindiskyldu hjá bankanum leiða til allt að 0,65 prósentustiga hærri útlánsvaxta en ella, á ári. „Þetta jafngildir kostnaði upp á 323 þúsund krónur fyrir 50 milljón króna íbúðalán,“ segir í umsögn Landsbankans um fjármálaáætlun fyrir árin 2027-2031. Þar gagnrýnir bankinn áformum ríkisstjórnarinnar um auknar sértækar álögur á fjármálageirann. Sjá einnig Boða hærri skatta á fjár­mála­fyrir­tæki Landsbankinn segir að ofangreindarn kostnað megi setja í samhengi við að fyrir íbúðalán í bankanum á föstum 12 mánaða vöxtum, sé vaxtaálag umfram stýrivexti Seðlabankans frá 1,25 prósentustigum. „Vaxtaálag vegna sértækra skatta jafngildir því u.þ.b. helmingi af vöxtum slíks íbúðaláns umfram stýrivexti.“ Bankinn segir að fyrir fyrirtæki sem skulda 5 milljarða króna séu 0,65 prósentustig rúmar 32 milljónir króna á ári. Slík fjárhæð nægi til að greiða fyrir um tvö stöðugildi á ári, með þeim jákvæðu áhrifum sem störf geta skapað. Landsbankinn segir viðbótarálögur á fjármálafyrirtæki geta einnig haft áhrif á samkeppnisstöðu gagnvart erlendum fjármálafyrirtækjum. Stærri íslensk fyrirtæki leiti reglulega eftir tilboðum í fjármögnun, þar á meðal frá erlendum aðilum, og skert samkeppnisstaða geti leitt til þess að bankaviðskipti stærstu og öflugustu fyrirtækja landsins færist í auknum mæli til erlendra fjármálafyrirtækja. „Slík þróun mun draga úr umsvifum innlends fjármálamarkaðar og hafa neikvæð áhrif á fjármálastöðugleika til lengri tíma.“ Fjármálafyrirtæki hérlendis bera þegar verulegar sértækar álögur. Í því samhengi þá greiddu íslensk fjármálafyrirtæki 21 milljarð króna í sértæka skatta og gjöld í fyrra. Landsbankinn bendir á að sérstakur skattur á fjármálafyrirtæki sé 0,145% af skattalegu bókfærðu virði skulda, umfram 50 milljarða króna, að skattskuldum frátöldum, og er ófrádráttarbær við útreikning tekjuskatts. Þar að auki leggst 6% sérstakur fjársýsluskattur á tekjuskattsstofn umfram 1 milljarð króna og kemur hann til viðbótar við almennan 20% tekjuskatt lögaðila. Einnig sé 5,5% fjársýsluskattur lagður ofan á allar tegundir skattskyldra launa og þóknana til viðbótar við 6,35% tryggingargjald. Auk þess lúti íslensk fjármálafyrirtæki hærri óvaxtaberandi bindiskyldu hjá Seðlabanka Íslands en almennt þekkist í nágrannaríkjum. „Upprunalegt markmið með sérstökum skatti á fjármálafyrirtæki tengdist kostnaði ríkissjóðs vegna fjármálaáfallsins 2008 og því að draga úr áhættusækni fjármálafyrirtækja,“ segir í umsögn Landsbankans. „Þegar Alþingi breytti skatthlutfallinu árið 2019 kom m.a. fram í nefndaráliti meiri hluta efnahags- og viðskiptanefndar að verulegur munur á sértækum sköttum hefði neikvæð áhrif á samkeppnishæfni íslenskra fjármálafyrirtækja og að ljóst væri að heimili og fyrirtæki greiddu a.m.k. stóran hluta sértæka bankaskattsins í formi hærri útlánsvaxta og lægri innlánsvaxta. Þá kom einnig fram að sértæk skattheimta skekkti innbyrðis samkeppnisstöðu á íslenskum lánamarkaði þar sem aðeins hluti lánveitenda þarf að greiða skattinn.“